Epifania
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Bon Capo d'ano | Edission e fonte ▼ | Onomastico → |
.jpg)
Ecce Magi ab Oriente venesunt.
Matth. II, 1.
I MAGI vegniva,
Vegniva trotando
Per via del comando
Che Dio ghe impartiva,
Ma inteso l'invito
D'Erode el tirano,
«Colega — i gà dito —
«Bon ano! Bon ano!»
La stela insegnava
Sentieri e tragheti
E i cari vecieti
Trotava, trotava.
El più povareto
El giera Sovrano
E tuto el terzeto
Cantava: «Bon ano!»
A un tratto ghe cala
St'aviso dal cielo:
«Vecieti, el putelo!»
«Xe dentro la stala!»
Aseo! Co i ga intesa
La fin del so afano,
I sbragia a distesa
«Bon ano! Bon ano!»
E là, su l'intrada,
Sfidando la bora,
I smonta, i tol fora
Corona e velada,
I mete, i botona
Le braghe de pano
E i canta: «Parona,
«Bon ano! Bon ano!»
«O Santa Maria,
Perchè xela mesta?
Ancùo xe la festa
De l'Epifania;
Ancùo ghe fa omagio
El mondo Cristiano:
Coragio! Coragio!
Bon ano! Bon ano!»
«La toga un pitàro
D'incenso Sabeo
E st'oro Eritreo
Che xe tanto raro.
Gh'è el bolo de Stato
Che mostra l'ingano
Co' l'oro xe mato...
Bon ano! Bon ano!»
«La varda sto fio,
Sto moro assabese
Che vien dal paese
Che i mostra el de drìo!
La pele de st'orco
La tenze anca el rano...
El par proprio un porco.
Bon ano! Bon ano!»
«La toga, la ciapa,
O Santa Maria,
Perchè andemo via
In zerca del Papa.
Sto vecio, a pensarghe,
Gà indosso el malano
E andemo a cantarghe:
Bon ano! Bon ano!»
«Se visita prima
La nostra Imbassada,
La gran piavolada
Che i fa in pantomina;
E dopo sto intrigo
Se va in Vaticano
Per dirghe, a l'amigo:
Bon ano! Bon ano!»
«E qua se disserta
Del belo del bruto,
Ma prima de tuto
Se lassa l'oferta;
Se basa el scapino,
Se fa el basamano
E ― Alegri, Bepino!
Bon ano! Bon ano!»
«E dopo, nel caso
Chel' gàbia i bigati
Se va da quei mati
Che scrive el Travaso.
Sta note i xe in festa,
I bala col piano
E Oronzo protesta...
Bon ano! Bon ano!»
«E dopo, molando
Un grato petardo,
Col treno in ritardo
Se parte cantando:
— Che Dio ve preserva
Dal mal e dal dano:
Che Dio ve conserva...
Bon ano! Bon ano!»