Campane!
|
Edission original: |
Gino Cucchetti, Spiere de Sol!, Roma, Tipografia Elzeviriana, 1905 |
|
Fonte: |
| ← Benefacere in laetitia | Edission e fonte ▼ | Turcheide → |
Co' le sona, che gran malinconia
che le me fa, ste cagne de campane,
le me ricorda storie brute e strane,
4le me fa perdar tutta l'alegria;
A pianzar come un fio me metarìa
co' le sento sonar ste... matarane,
le xe, ve digo mi, proprio vilane,
8più che le sona, più le sonarìa!
Cussì dixeva fin a zorni fa,
10ma adesso per incanto gò cambià!
Dovè saver che Toni, el campaner,
sta spusseta de nonzolo forbìo,
scominzia a la mia Nina a starghe adrìo
14metendome cussì in un gran pensier.
Xe vero che sto Toni maledeto
fra le messe, i soneli e le funzion
da matina a la sera, povareto,
18Ghe toca tirar sempre... el campanon;
Ma pur co' tuto questo, Nina mia,
20el campaner m'ha messo in gelosia!...
Soneu o no soneu digo xe ora!
dove saràlo Toni, el campaner?...
eco che le scomincia... oh, che piaçer,
24me par quasi che in sen el cuor me mora!
Che zogia co' le sento a sbatociar...
din... don... sonè, non me n'importa un corno:
adesso che le cosse à cambià star
28vorìa... che le sonasse tutto el zorno!!!