Capriccio per Nozze Galletti e Mantovani
|
Edission original: |
Collezione delle migliori opere scritte in dialetto veneziano, Volume ottavo: Poesie di Pietro Buratti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 8.djvu |
| Edission e fonte ▼ |
Per tor la cossa ab ovo:
Co 'l mondo gera novo,
Vogio dir, co nasseva per i prai
Senza esser semenai,
Ne manco coltivai,
Fruteri d'ogni sorte,
E ve cascava in boca
Piu boni de i confeti
Pometi, persegheti,
Zeriese, marinele, baracocoli,
E peri col butiro e peri gnochi;
Co nissun gera in tochi
Perchè tuti godeva la cucagna
D'una bela campagna,
Nè se chiamava ladro
Chi in mezo a sta abondanza
Se impeniva la panza;
Amor, quel briconcelo
(Fio bastardo de Venere e de Marte,
Se no fala le carte)
Per comando de Giove el gera quelo
Che se toleva spasso,
E in aria da putelo
El faceva alto e basso:
Un per de alete in spala,
Una benda su i ochi e un'arco in man
Gera tuto l'arnese
De sta bardassa figurin francese:
Più svelto de un oselo
El coreva dì e note
Per le poste del Cielo:
Ancuo, fe conto, al Dolo,
E doman dove? gnente manco, al Polo:
E po, senza far tapa,
Doman l'altro de peso
Tra le fumane del Monomotapa;
E cussì de sto troto
Da levante a ponente
Zirando zornalmente
Sto brayissimo puto
Gaveva l'ochio a tuto,
E a la bona de Dio
Con chi ghe dava l'estro
Ghe faceva far nio
A tuta sta famegia de viventi
Senza formalità, nè complimenti.
Giove serava un ochio; e per esempio
El Cielo averto gera alora el Tempio
De le nozze de tuti.
Missiai pute co puti
I balava, i cantava,
E co Amor decretava
Con un mezo sospireto i se vardava,
E in bota i deventava,
Senza darse la man, mario e mugier.
Alora, oh che piacer!
No ghe gera bisogno
De domandarghe al pare,
Molto manco a la mare,
No se faceva scielta del compare;
No ghe gera contrato,
Nè dote preparada,
(Che xe una gran secada!)
Ma tuto gera fato,
Come che se sol dir, dal dito al fato.
E per questo quel secolo,
Che xe sta veramente un gran tesoro,
I Poeti lo chiama quel de l'oro.
Ma come po a la longa su sta tera
O no regna la pase,
O de tuto fa i omeni cagnera,
Da sta facilità de dir del sì
E de darse del ti
Xe nati de i disordini reali
Che à messo in confusion tuti i mortali.
Apena deslatai,
In libertà lassai,
Gera i puteli a l'incirca tratai
Come che trata i gati i so gatini,
O i gali i pulesini.
El mario dopo un ano el se stufava
E a un'altra el se tacava;
Qualcheduna rugnava,
Ma dopo un per de dì la baratava,
E la se consolava,
E cussì de sta sia
La vose de natura sepelìa
Da quel birbo de Amor,
No ghe gera più cuor
Molto manco pudor,
E i poveri puteli,
Ridoti un ospeal de bastardeli,
No i pronunziava più,
Come che tuti fa,
El nome de la mama e del papà;
Alto là, alto là,
Giove un zorno ismarà
À zigà dal'Olimpo: Sta bubana
Xe un poco tropo per la razza umana;
Mercurio a tì: va zo de mala pressa,
Cerca de Amor, dighe che l'è un birbante,
E che buta le bave el gran Tonante.
Che son stufo de lu, che tiro indrio
El mio vechio decreto, e che ghe intìmo
Un aresto in Citera, e de star sconto
Fin che se me presenta un rendi-conto.
Più veloce de un fulmine
Cala Mercurio in tera;
E come un malfator
Condoto xe in Citera,
Ligà l'ale e le man,
Sto bravo cortesan
Che comandava prima da tiran:
Cazzà cussì in preson,
El capo del bon ton
Giove se mete a spazzizar le Stele;
E in mezo a le più bele
El trova dona Urania
Ghe sul far de la note
Gera per tacar soto
El caro de Boote.
Ferma, el ghe dise! Amor, quel zizoloto
Co le so bardassae m'à proprio roto....
Urania tì m'intendi: el birbo xe in castigo;
Ghe vol un altro che me giusta el mondo,
E che vada secondo
A riparar el marzo che à lassà
Quel puto disgrazià:
Ò butà l'ochio za
Sul to unico fio:1
L'è zovene, ma so che l'è un ometo,
Lo vòi Governator, eco el Decreto.
Da quel momento Imene
Senza el fogo de Amor, ma co più sal,
Scarabochiando un codice formal,
El s'è messo a portada
De dar a tanti mali una netada,
In compagnia de lu
Xe calada Virtù,
E i omeni che più
No se sognava de vardar in su
À capìo che vardando sempre in zo
Diferenza ne gh'è da lori al Bo.
La puta vergognosa
À butà fora del pudor la rosa;
No la ga scielto a mazzo
Per sola vogia de ubidir Natura,
Ma co una fiama pura.
Per opera d'Imene,
La ga divinizà le so caene.
S'à stabilìo d'acordo
Ch'el lazzo d'Imeneo sia un lazzo forte
Che no possa spezzar altro che morte.
Nè se credeva alora
Che, intrigando le togne,
Podesse l'avocato
Ridur manco del zero sto contrato.
S'à cocolà i putei,
Anca nati zemei,
No i s'à lassà più soli
Come tanti pandoli;
In soma in poco tempo
Imene, bravo muso,
El mondo l'a refuso,
E da la confusion
Del zizola imbrogion
S'à visto saltar fora;
Come dal primo caos, la nova aurora:
Imene da quel zorno
(Scartando i Sposi che no val un corno)
À sempre cantuzzà
Co Nozze ghe xe stà:
E se vien fora spesso de i Soneti
Alquanto brodoseti
Vol dir, che i so conceti
Per l'organo passando de i Poeti
I chiapa el mal del legno;
Ma se la xe cussì, sarogio degno
De ripeterve ancuo
Sul chitaron za frusto de paluo
La nova Canzoncina
Che a la mia rechia fina
Me porta un zefireto de matina?
No ghe meto del mio,
Quel che parla xe el Dio:
Interprete de lu, Sposi, ascoltème
E se facesse fiasco perdoneme.
Margarita,
Dreta in yita,
Svelta più de una cerveta
Dal to sposo benedeta,
Che te mor co i ochi suso
Incantà da quel bel muso,
Via a la presta
Da la testa
Cava i aghi e le forchete
Che te tien le drezze strete;
E più liberi e più bei
Vada zoso i to cavei.
Abastanza
Per creanza
Tuto el zorno ti xe stada
Ne i to abiti ligada,
Mastegando complimenti
A i to amici, a i to parenti;
Zo i diamanti,
Zo i brilanti,
Zo i strighezzi parigini,
Fiori, nastri e merli fini;
A sta ora basta un ve1o
Che te sconda apena el belo:
Tuto tase,
E per le case
Da la Note semenai
Cala i sogni, e indormenzai
I marii de data vechia
I xe duri assae de rechia.
Ma per quei
Che xe novei
I papaveri no cala,
Impasienti el cuor ghe bala,
E sensibili a i mi doni
I spalanca un per de ochioni,
Coragiosa,
Bela sposa,
Cori in brazzo chi te adora,
La mia fiacola tra un'ora
Scaldarà pronuba i feri
Ne i dolcissimi misteri.
Per un nodo
Tanto sodo
Chiaparà, te lo prometo,
La to patria più conceto,
E ignorar che gh'è Bertiolo
Sarà un segno de pandolo.
Che bei fruti!
Che bei puti!
Nassa el primo senza boria,
Companizete la gloria,
Che impegnar no te vòi tanto
De l'amor nel primo vanto.
Ma fecondo
Del secondo
Co sarà, Sposa, el to grembo,
Non el Taaso, non el Bembo,
Ma de un Cigno più vicin
Cerca in casa l'oro fin.
Vastu a segno
Col to inzegno?
Vogio dir da Giacometo2
De le Muse predileto,
E de Pindaro fradelo,
Cerca un pezzo da cartelo.
Solo un pezzo?...
Che sempiezzo!
Roba tuto el scartafazzo
Dove gh'è belezze a sguazzo,
E tamisa zorno e note
Le pindariche so bote:
Ispirà
Da to Cugnà
El bambin cussì sarà
Che secondo nasserà,
E co i altri dise oà
Qualche verso el te farà:
A le porte
No pol morte
Bater più se gh'è un aloro:
El Poeta xe un tesoro
Che pol dir, bezzi no go,
Ma crepar? oh questo no.
- Note