Casson xe Bonbon!
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Sessolote... | Edission e fonte ▼ | Bosco dei Pini → |
Nina, mi solo scoltime
Spalanca ben la recia,
E serila ale prediche
Che te farà la veda,
Co ela iera giovine
Te credi forse ti
Che in carneval in maschera
No la s’à divertì?
Lassù al Politeama
Andemose a blangiar,
A costo che tu mama
Te gabi de refar...
Ah! Ah! Ghe disi el popolo
Andemo su in casson,
Casson?... va ben, ciamemolo,
Ma inveze el xe un bonbon.
Rifilime un garofolo
Se mi te toco un deo,
E se la vecia brontola
Ti faghe marameo;
Za el cor me salta e sbisiga
Co penso de balar...
Dai, negra mia, distrighite
No stame far rabiar!
Lassù al Politeama, ecc.
Voio saltar, blangiarmela
I corni farghe al leto,
E in qualche polca celere
Petarte un bel baseto,
E la matina in cinberli
Darghe un’adio al casson,
E, che lavori l’orso,
Par mi vado a paion.
Lassù al Politeama, ecc.