Cercando i anarchici
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← La moda... bombardiera | Edission e fonte ▼ | Fitual... fin de siècle → |
Alleluja, et... alleluja!...
Fora son de gatabuja....
Per un miracolo!
Scominzià gaveva apena
De scontar la dura pena
De sete... brustoli
Che sgnacà m'à 'l Tribunal
Per quel furto colossal
Al Banco Prestiti!...
Figurève se là drento
Mi podeva star contento!...
A piè d'un albero,
Mi gaveva, in fondo un orto,
Fato un buso e sconto el morto
Che ancùo rissusita
Per virtù d'un... stratagema
Proprio degno de un poema
E de... contàrvelo!
Za che vivo alegramente
Qua, nel novo Continente,
Fra i galantomini...,
Posso far senza paura
De mandati de... catura,
L'omo de spirito....
E spiegarve in sto zornal
La trovata per la qual
Me trovo... libero!
Ciamo un zorno el secondin
E ghe digo pian pianin:
— Va... cori subito
Dal Questor o dal Prefeto...,
Vaghe a dir che go un secreto
Importantissimo!... —
. . . . . . . . . . . . . . . . . . .
. . . . . . . . . . . . . . . . . . .
Poco dopo so sentà
Sora un comodo sofà
Co l'ilustrissimo
Sior Questor, al qual ghe digo
Che conosso un certo intrigo
De... capi anarchiçi!..
Che conosso ben el sito
Dove i pezo del partito
I core a scònderse...,
Che mi za m'impegnaria
De guidar la polizia
Co molta tatica...
E de darghe ne le man
Quela razza... fiolduncan
De zente barbara!...
El Questor, riconoscente,
Me fa el viso soridente
E, ringraziandome,
El me acorda la man drita,
Quatro guardie, pronta uscita
E.. carte in regola!...
. . . . . . . . . . . . . . . . . . .
. . . . . . . . . . . . . . . . . . .
Semo in strada..., caminèmo
Çirca un'ora e, quando semo
Darente un Bàcaro,
Fazzo moto a i puliziai
De star fora, preparai...,
Che là za i càpita!...
Preparà co furbaria
Tuto el pian de.. scampar via,
Entro nel Bàcaro!..
In do salti so in cantina
Dove gh'è 'na portesina
E... viaaa..., infis'ciandome
Del Questor, de i secondini
E de i quatro questurini
Che stà spetandome!!...
La moral de sto bel caso
La gavemo soto el naso,
E la xe... logica:
De fidarse no xe mai
De quei tai che xe bolai
Da la Giustizia!
- Note
- ↑ Pubblicata nel giornale umoristico Sior Tonin Bonagrazia.