Fitual... fin de siècle
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Cercando i anarchici | Edission e fonte ▼ | L'ideal de l'oportunista → |
Gera fermo soto un arco
De la Piazza de San Marco,
Quando me càpita
A le spale un colpo seco
Soto forma de sior Checo,
Paron de stabile!...
― El xe lu, se no me falo!... —
Bona sera!... Come stalo?...
― Zo..., manco ciacole!
Quando pàghelo l'afito?...
Ma, no 'l sa..., ma no go dito
Che go dei crèditi...,
Che conosso el mio dover?
Via! El me fazza sto piacer!
― No fazzo un'ost...rega!
Un dì o l'altro, el se la 'speta,
Mi ghe mando la disdeta,
E... ocio i mobili...,
Chè se mai me salta l'estro,
Mi, per dio, ghe li sequestro! —
Ma, come parlelo?
Xelo el modo, questo qua!...
Dove xe l'umanità?!...
Ma cossa crèdelo?
Se lo ciapo per el colo
Ghe lo strenzo e no lo molo
Fin che go ànema!
— Zo!... El se quieta! Andemo..., el tasa;
Mi lo lasso star in casa..
Quanto ghe comoda! —
Per vualtri ghe voria
Che s'ciopasse l'Anarchia..
Magari subito!
― Zo!... No 'l ziga, chè la zente
La fa bòssolo per gnente!...
Eco qua i Vigili!... —
Da qual labbro è mai partita
La ria frase or ora udita?
Senza confònderme...,
Mi ghe mostro ai do... prussiani
Vigilanti e... molto urbani
Sior Checo Mèmini
Che l'andava come un treno
Senza guida e senza freno...,
A tuta machina!
Dito un grazie a malapèna
E voltàndome la schena,
Al novo... anarchico
In do salti i ghe xe adosso
Come cani sora un osso
E... i te lo intrâpola!
Mi, contento del colpeto,
Scampo a casa e vado in leto
E... me la spàpolo,
Ripensando ai casi strani
Che suçede ai barbagiani
Spaventa çeleghe...
Rifletendoghe un tantin
Al progresso... berechin
De sto bel sècolo!