L'ideal de l'oportunista
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Fitual... fin de siècle | Edission e fonte ▼ | Autofotografia istantanea → |
El mio ideal politico
Gera republican,
Perchè da la Republica
Sperava aver un pan!...
Inveçe i tempi, in seguito,
Xe deventai più tristi...,
E m'ò dà corpo e anema
In man dei soçialisti!
Ma el pan e 'l companàdego,
Che tanto sospirava,
Se convertiva in ciacole
E mi... no me saziava!
Me xe vegnudo un impeto...
Un rabiosesso tal...
Che go butà in malòrsega
El novo mio ideal!
Alora, senza pèrderme,
Senza pensarghe suso,
Col volto de l'anarchico
Me son coverto el muso!
Ma go capio ben subito
Che gnanca in quel partito...
No se pol star pacifici,
No se pol far pulito!
La Comission, el Codice
Me dava da pensar...
E mi co ste inquietudini
Cossa doveva far?...
Go tolto su el coragio
Co tute do le man...
E go lassà quel viver...
Stranatasson d'un can!
Per non aver più incomodi
De sbiri e de manete...
M'ò consiglià col Diavolo,
E... me son fato prete!