Autofotografia istantanea
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← L'ideal de l'oportunista | Edission e fonte ▼ | Per nozze → |
Domando scusa a Gasparo 1
Se mi, in sto mio ritrato,
Son più riconoscibile
Che in quel che lu m'à fato!
De misura...
La statura.
No gh'è un sfriso
Sul mio viso
Rubicondo!...
Pelo biondo;
Mustaceti
Picoleti,
Da cavreta
La barbeta...
No per caso
Sul mio naso
Vedarè
El pince-nez
Boulanger
Che, savè,
Nel cristal
Fato oval
Gh'è incavai,
Levigai,
Do perfeti
Tondoleti...,
Do lunete
Picolete..
Dove brila
La pupila
De i me ocieti
Sempre inquieti,
Biseghini,
Fureghini!...
Gaspareto
Benedeto,
Da vecieto
No go el muso;
Mi so dreto
Come un fuso..,
Dove peto
Sbrego..., sbuso!
So furioso,
Ma no mato,
So un bel toso
Educato...,
(In un sito...,
Ieri sera,
Me l'à dito
La massera)
E so bon!...
Son insoma
Un paston
Che se doma
Come i vol...,
Se i me tol
Co maniera,
Bona çiera,
Cuor in man...
E so can
Se del mamo,
Poro gramo
Calcolà,
Me se dà!...
Bruto o belo
Go un capelo
Duro, e un molo...,
Go el dàcolo
Co cravata...
Tanto fata!
Go un paletot
E l'ulster go..,
Mantelina
Svolarina...
E go i guanti
Per el gelo
Tuti quanti
Col so pelo!
Quasi tuti,
Co spassiso,
Pute e puti
Vardo in viso;
Ma nissuno,
Ma gnanc'uno
Gh'è per strada
Che me bada!..
E si un Pindaro,
Un talento,
Un miracolo,
Un portento...
Mi me credo,
Mi me vedo!...
Mondo infame...
Che no cura
Sto... salame
Per natura!
- Note
- ↑ Gasparo, noto caricaturista del giornale umoristico veneziano Sior Tonin Bonagrazia nel Novembre del 1895 volle farmi la caricatura che riuscì poco rassomigliantemi.