Per nozze (Giuseppe D'Alpaos)
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Autofotografia istantanea | Edission e fonte ▼ | Una suplica a la «Bepi» → |
L'Amor che xe 'l dispotico
Paron de tuti i cuori...
E che a sto mondo el sèmena
Per tuto spine e fiori;
L'Amor che xe un teribile
Mato de prima sfera..,
Che 'l fa, el desfà, el scombussola
Come che 'l vol la tera;
L'Amor che xe un volubile,
Che 'l xe una bona pele...,
Ghe ne sa far de classiche,
Ghe ne sa far de bele!...
Ma co 'l vol proprio meterse
Sul serio e tirar drito...
Alora el sa distinguerse,
Alora el fa pulito!...
E un vero esempio pratico
De tanta serietà
In Teresina e Giacomo
Ancuo l'Amor n'à dà!..
Perchè davanti al sindaco,
Come davanti a Dio,
El ga mandà do àneme
Che i lo ga ben capìo!
E mi me ne congratulo
Coi Sposi, de gran cuor,
Che, 'scoltando le massime
Sante del Dio d'Amor,
Streti nel saldo vincolo
Dolçissimo e gentil.....
I godarà de splendidi
Zorni un eterno April!