Confidenze
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Leggendo il Vangelo | Edission e fonte ▼ | Cogitazioni → |
.jpg)
O Roma, o morte!
G. Garibaldi.
EN zardin, dopo messa, la matina,
A spasso me n'andava
Per goderme quell'aria frescolina
Ch'el cor me imbalsamava.
E da l'ombra zercando un po' d'agiuto
Contro sti eterni caldi.
In cao de tuti i viali e da per tuto
Vedeva Garibaldi.
El xe un coloso enorme de metalo,
Drito, in posa gagiarda,
Che imobile e piantà sul so cavalo
Volta la testa e varda.
Nel ciel puro e seren come uno specio,
Varda la note e el dì...
Cossa vùstu da mi, povaro vecio,
Cossa vùstu da mi?
Gàstu, come el Signor, roto la piera
De la tomba lontana
Per vegnirme a veder fin da Caprera,
O vinto de Mentana?
Vinto? El vinto son mi che son qua drento,
Povaro carcerà,
E vardo suspirando el monumento
Segno de libertà!
La libertà! Quanto ti gà soferto
Per farla trionfar!
Ti gà sfidà la morte a viso averto,
El ciel, la tera, el mar.
E mi, quando i todeschi comandava
Sovra el nostro teren,
Caro vecio da Dio, mi t'aspettava
E te voleva ben!
La libertà! La gò credesta fola
Da trapolar la zente,
Emblema framasonico, parola
Che dise poco o gnente,
Ma adesso? Ah, come giudico diverso
E come son pentìo!
L'omo conosse el ben co' lo gà perso,
Chę nol torna più indrìo!...
Sol me doleva che dei nostri preti
E del trono papal
Nei to discorsi, sì... tropo indiscreti,
Ti parlassi un po' mal,
Ma adesso? Adesso che cognosso l'arte
E me trovo in preson,
In tuto no dirò, ma forse in parte,
Ti gavevi rason!