Leggendo il Vangelo
|
Edission original: |
Olindo Guerrini, Le Ciàcole de Bepi, Roma, 1908 |
|
Fonte: |
| ← Trenodia | Edission e fonte ▼ | Confidenze → |
.jpg)
QUANDO el Signor, che Dio lo benedissa,
Caminava ramengo in Galilea
Fra la canagia Scriba e Farisea,
Stagnando el sangue de l'emoroissa,
Senza gendarmi e svizari el godeva
La santa libartà che tuti gode
E lo lassava andar lo stesso Erode
De dì e de note, dove ch'el voleva.
E l'andava, fasendo le so tape,
A marendar secondo el giera in vena,
Da Marta, Da Maria, da Madalena,
O in barca co San Piero a pescar cape.
Nol gavea bussolanti o scopatori,
Pronotari o camerier segreti:
El divideva el pan coi povareti,
Perdonando le colpe ai pecatori.
Nol gavea visto un frate o una badessa,
Nol gavea vesti rosse o pavonaze,
El viveva al gran sol, sora le piaze,
Pregando Dio ma nol cantava messa.
La verità el la predicava nuda
E per questo i ga dà martirio e morte;
Nol dispensava cariche de Corte,
E nol gaveva altro cassier che Giuda.
E adesso? Adesso el so Vicario indegno,
I padri Gesuiti e la paura
I lo tien in preson dentro ste mura
Come una zogia al Sacro Monte in pegno,
E me toca sforzar le Decretali
Per tegnirme vesìn le mie sorele,
Che povarete, no le xe più bele,
Ma che le gà più cuor dei Cardinali.
E tutti i zorni importunar me sento
Co supliche e memorie e scriturine,
Per susidi, per mance e per propine,
Da tanti magnapan a tradimento.
Gò un popolo de preti e de badesse
E de frati che assedia el mio Palazzo
Per la gran vogia de non far un corno,
O d'aver la dispensa de le messe.
Tuti i cerca raspar per ogni verso,
E nesun pensa a Dio, tuti a la panza,
Se va mal in Italia e pezo in Franza
E al primo temporal semo a traverso.
Quanto a la verità povera e nuda,
Soltanto Cristo la conosse in cielo:
De i Apostoli po' de l'Evangelo
Chi ghe xe restà ormai? apena Giuda!