Dialogo tra un Professor d'Astronomia, e un vechio zentilomo
|
1828
|
|
Edission original: |
Luigi Bampo, Miscellanea o trentacinque cose per trentacinque soldi, Treviso, Francesco Andreola, 1828 |
|
Fonte: |
Indice:Bampo - Miscellanea o trentacinque cose per trentacinque soldi, Treviso, Andreola, 1828.pdf |
| ← El viazo in pressa | Edission e fonte ▼ | El Ragno → |
Prof. Dunque, come che ghe diseva, Selenza, me xe arivà da Londra el canochial; el me costa za un ochio dela testa, ma se no altro, l'è un capo bon, el me serve pulito, e no son gnente scontento.
Zent. Lo gaveu quà? Caro vu, lassemelo vedar, perchè bisogna che sapiè, che la stronomia e i canochiai xe la me passion predileta,
Prof. Co no la vol altro, la servo subito. La gabia la bontà de far sta scala, e andemo in specula . . . Ecolo qua, cossa ghe par?
Zent. Xelo questo? Uh, che picolo! Sentì, caro fio; mi me par che spendar tanti bezzi in t'un canoto cussì, sia l'istesso che butarli zo per el canal.
Prof. La perdona, Selenza; ma in sti afari no bisogna miga star in tuto a l'aparenza; se la savesse cossa che l'ingrandisse! Se vede quel che se vol.
Zent. Co la xe po cussì, gavè rason vu. Da brao, via, feme vedar qualcossa.
Prof. Adesso un momento, che lo meto sul cavaleto.― Cossa fala po, Selenza? Per cossa se metela i ochiai?
Zent. El me caro minchion, perchè senza ochiai mi da lontan no ghe vedo.
Prof. La fazza a modo mio per sta volta, la se li cava, e ghe assicuro che la ghe vedarà l'istesso. La me diga intanto cossa che la gavaria vogia de vedar.
Zent. Co v'è da dir la verità, saria curioso de saver, se selenza Biasio me fradelo xe in botega da Florian a lezar i sfogi.
Prof. Cossa mai disela? Questa xe una cossa impossibile.
Zent. No m'aveu dito che se vede quel che se vol? Co no s'à da vedar i so interessi, da che farghene del vostro canochial? E sì, vogio dir, no gh'è sta gran distanza da Padova a Venezia. Anca sì, che no se pol vedar gnanca el campaniel de san Marco!
Prof. Oh questo po sì, quanto che la vol. La varda mo quà, che la lo vedarà.― Lo vedela, Selenza?
Zent. Mi no vedo gnente.
Prof. La staga ben atento, perchè me par impossibile...
Zent. E mi ve rispondo, che no vedo gnente una maladeta.
Prof. Sala cossa che gh’è de mal? Un orizonte no tanto bon.
Zent. Ah! se vede proprio che no se un omo de mondo. El me caro pampalugo, co avè speso tanti bezzi in tel canochial, mo per cossa no butar via qualcossa altro, e no farve vegnir da Londra anca un bon orizonte?