El Biglietto purgativo
|
1826
|
|
Edission original: |
Luigi Martignon, Raccolta poesie veneziane dell'autore dei Capricci poetici nello stesso dialetto stampati nel 1819, Parte seconda, Treviso, Francesco Andreola tipografo, 1826 |
|
Fonte: |
Indice:Raccolta poesie veneziane dell'autore dei Capricci poetici nello stesso dialetto 2.djvu |
| ← Sonetto per Nozze | Edission e fonte ▼ | La Penitente → |
Eh ghe vol altro? le ricerche sfiocca,
Se pretende novelle a piena bocca,
E se darghene devo a tutti a tutti,
I piatti forti sfuma, e semo ai frutti.
Ma qual altro dover
Xe quel del novellier,
Risponde in un canton, quel che no sa,
De trovarse in ste carte registrà?
Ben lo vostu vecchietto,
Te piase sto toretto?
Fastu co tocca ai altri el bel bocchin?...
Fora la piaga, e qua ghe 'l cerottin.
In amoroso lazzo
Fra pelegate a sguazzo
Vivea do vecchi stolidi
De settanta anni, e và.
Spesso l'umor geloso
Fa el vecchio assae rabioso;
O viceversa in colera
Mette la so metà.
Quei che conosce el fatto
Dise che per un gatto,
Ghe sta un disgusto orribile
Un dì fra sti bisù.
Qualcun che sbara bombe
Vol fra ste do colombe
Guerra gelosa acerima,
Che no finiva più.
Per quella causa, o questa
A quell'union funesta,
Da longo tempo pase
Certo no ghe xe stà.
E no podendo el putto
Ormai soffrir de tutto,
Lassar vol quella Fillide....
Sarà quel che sarà.
Za la rason nol quieta
Un biglietin lu deta,
L'ha stabilio de darghelo
Finia conversazion.
Ma quella sera prima
De andar dalla so grima,
Cargo sentindo el stomego
El va dal so spezier.
E come avezzo el gera
Provede in quella sera
Per sbarazarse el stomego
Un purgantin lezier.
Distratto dai so affetti
Confonde i do pacchetti,
E invece della lettera
El purgantin ghe dà.
Sto puro fallo, tolto
Xe sta sul serio, e molto,
Perchè alla vecchia massime
Spuzzava tanto el fià.
E l'ha suposto presto,
Ch'el vecchio abbia volesto
Cussì ridurla a intenderlo
Stuffo de quell'udor.
Da quel momento oh Dio!
Xe sti colombi al nio,
Nè de vardarli el pubblico
Prova mai più el dolor.
Se despiasso la v'ha, l'avè volesta....
No fe quel muso, e no menè la testa.
.jpg)