El bel tenor
|
Edission original: |
Augusto Levi, Versi in dialetto triestino, Trieste, Caprin, 1915 |
|
Fonte: |
| ← Avemaria | Edission e fonte ▼ | El campanil de S. Giusto → |
Quel nome fa miracoli
Tute le mule ciama,
Le cori come fulmini
Suso al Politeama,
E quando vien in scena
E canta el bel tenor,
Le gongola, le spasima,
Ghe sbisiga nel cor.
Vardelo che cocolo
Col canta e col tasi,
Che oci, che boca,
Che boca de basi!
Che vose, che denti!
Che spale che el ga!
Restar inocenti
Xe proprio un pecà!
Che sia la Tosca o Carmen,
Traviata, opur Fedora,
Quel benedeto giovine
L'incanta, l’innamora;
Pute, sposade, vedove,
Se senti un gran calor
E le va tute in estasi
Co canta el bel tenor
Vardelo che cocolo. ecc.
Quel fogo lu smorzarlo
Voria con gran piazer!
Magari! xe impossibile.
Nato nol xe pompier.
Caveve dunque i grizoli,
Andar no ste in furor,
Mule contentè l’ocio,
Guardando el bel tenor.
Vardelo che cocolo, ecc.