El bontempon
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← L'ipocondriaco | Edission e fonte ▼ | L'avocato filosofo → |
EL BONTEMPON
Cossa xe? Un’altra letera?..... Confesso
Che no me l'aspetava.... Cossa fazzo?
Mio fradelo no scrive tanto spesso,
E da un mese el mio vecio à perso un brazzo.
Semo de carneval, e go promesso
De vestirme stasera da pagiazzo:
Se mio pare sta megio opur istesso,
No gh’è rason de perder el solazzo.
Se invece, povareto, tuto in t'un
El fusse andà, so fio cossa ghe falo?
El dolor no ressussita nissun.
La verzo o no la verzo?.... Tanto fa,
Metemola in scarsela e andemo al balo:
La lezarò doman pena svegià.