El navigante
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El svizzero e 'l francese | Edission e fonte ▼ | La cavalcata → |
Sior Spiridion Stalfin,
Mercante dalmatin,
Quantunque navigando
Co del profito grando
5Avesse fato
Un belissimo stato,
E quantunque arivà d'ani sessantasete,
Che ze giusto l'età
Nela qual l'omo cerca la so quiete,
10La vita el seguitava nonostante
Pericolosa assae del navigante,
E anzi quando el gera
Per qualche afar in tera
El sospirava l'ora
15De poderse sbrigar
Per tornar
Fora.
Essendo mesi fa
Felicemente entrà
20Da paese lontan
Per Malamoco
Co un carico de gran,
E per causa del vento da siroco
No podendo andar via
25Co st'altra mercanzia
Che 'l gaveva imbarcà
Per l'Inghiltera,
El s'à trovà
Una sera
30Sentà fra vinti trenta
Al cafè de Florian,
Botega che frequenta
Tuto el genere uman,
Dove per passatempo discorendo
35El ze andà la so vita descrivendo.
Dopo de aver contà
Le aventure curiose, i casi strani,
E le galanterie che ga tocà,
Spezialmente fra i popoli otomani,
40Quando, mancante ancora d'esperienza,
El gera nela prima efervescenza,
E che, vero bardassa,
Suponeva poder, come foresto,
Torseli per el cesto
45Un poco massa,
Dando co sto argomento
Sogeto de comento
Per cavar la risata;
E dopo averghe fato
50Con imensa bravura
Un catalogo esato,
Una pitura
Precisa quanto mai
Dei loghi visitai
55Più interessanti,
E le cosse importanti
Aver descrito,
Ste parole l'à dito:
— El mistier mi che fazzo
60Insina da regazzo,
Da le carte che go dessù in sofita
Se rileva che i mii l'à sempre fato,
Spesso per altro a prezzo de la vita,
Co bon, discreto, o tristo risultato;
65Mio bisnono, mio nono, mio sior pare,
Co tuto l'equipagio s'à negà,
E mi, fortune rare,
Che tre volte in mar negro ò naufragà,
Perdendo el bastimento,
70Le mercanzie e la zente
Che se trovava drento,
Miracolosamente
M'ò podesto salvar
Savendo ben nuar;
75Per altro so riuscio
Co l'aiuto de Dio
A farme finalmente
Un stato a la parola
Più assae che suficiente
80Essendo vita sola;
Ma causa le paure,
Le angustie, le sventure,
Le strussie, i patimenti,
E i soferti malani,
85Gera de quarant'ani
Senza denti;
Sina dal primo viagio
Che go fato naufragio
So stà per un gran trato
90Sordo, ma sordo afato;
Me ze cascà
I cavei,
M'ò scavezzà
Do dei,
95Go squasi perso un ochio,
Me so slogà un zenochio,
Che deboto
Per esser mal curà
A rischio son andà
100De restar zoto,
E co ze tempo suto
Me sento dei barometri pertuto.—
Alora salta suso
Un certo Paulo Buso,
105De testa assae meschina
E possidente,
Do cosse che se abina
Facilmente:
— La scusa sior Stalfin,
110Mi proprio resto
Dopo quel rosolin,
Che ga tocà,
E l'esempio funesto
Dei soi che s'à negà,
115Ela, za possessor
D'una sostanza
De qualche rilevanza
Da poder far la vita del signor,
Come che ancora a andar
120La continua per mar —
Dise sior Spiridion:
— A sta so osservazion
Avanti de risponder saver voi
Dove ze morti i soi —
125Mio pare povareto
Ze morto sul so leto,
Mio sior nono anca elo,
Che mi gera putelo,
E sul so leto per bontà de Dio
130Tutiquanti i mii vechi ga fenio —
Alora el navigante,
Che no gera ignorante,
— Ze qua dove la voi:
Se dunque tuti i soi
135Sul leto ze mancai,
Come, la me risponda, come mai
Sior Buso benedeto
Porla ela ogni sera andar in leto? —
La giusta riflession,
140Che à fato Spiridion,
Ga prodoto l'efeto,
Che sior Buso
Prima de andar in leto
Da quela volta in qua ghe pensa suso.
145Chi nel pericolo
Ze co frequenza
Lo afronta e supera
Co indiferenza.