El quadro
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← El papagà | Edission e fonte ▼ | I do ustinai → |
Un certo conte Dario,
Un omo milionario,
Un Epulon,
Ma scarso de sapienza,
5E pien in conseguenza
De ambizion,
L'aveva fato aquisto de un palazzo
Dove 'l spendeva a sguazzo
Per ridurlo un sogiorno
10Da passar l'ore ben la note e 'l zorno.
Dopo fornio ogni sito
Con un gusto squisito,
Dopo tanti lavori,
Gran aquisti de bronzi e de sculture,
15Che ga costà tesori,
Se pensa decorarlo de piture;
Fa esborsi generosi
ln quadri i più famosi
De celebri peneli,
20Tiziani, Tintoreti, Rafaeli,
E trovandose in quele pertinenze
Da poco capità
Un pitor da Firenze,
Che pareva de qualche abilità,
25Ghe ordina la cena che 'l Signor
Coi so Apostoli à fato,
Fissando col pitor
Preciso el pato
De darghe cento scudi e vinti a zonta,
30Purchè in t'un mese l'opera sia pronta.
L'artista, che lo trova un pato d'oro,
Se dedica al lavoro
Co gran assiduità,
Ma sempre frastornà,
35Sempre distrato
Da l'imensa paura,
Che a terminar afato
La pitura
Un mese solamente
40Nol ghe sia suficiente,
E che ghe vaga,
No adempindo in sto termine l'assunto,
A spasso un sesto in punto
De la paga;
45Per altro in tal maniera ghe da drio
Che 'l quadro in trenta zorni ze finio.
Contento contenton
Al conte Dario ghe lo va a portar,
El qual con atenzion
50Metendose a contar
Le figure, che 'l quadro presentava,
Rimarca sul mumento
Che i Apostoli a tredese arivava;
E qua se vede l'omo de talento,
55Perchè se un rico sà,
Che del Signor a cena
I gera una dozzena,
Vol dir che l'à studià,
Le prove essendo tante,
60Che chi ga bezzi più ze più ignorante,
Salvo a bona rason
Qualche rara ecezion.
Alora rivolgendose a l'artista
El ghe dise — me par, se no à falà,
65Che sia corso una svista;
I Apostoli, che alora ga cenà,
Credo lo savarè,
Gera dodese, e invece
Qua tredese ghe n'è,
70Dunque uno cresce. —
Ma lu più assae imbrogion che no pitor,
Per no dar da supor
De aver comesso
Sto strazzo de maron,
75E no meter la paga in compromesso,
Ghe trova a quel minchion
Sta scusa pronta:
— Quelo che ze de più no la lo conta,
Perchè 'l magna un bocon, e po el va via.
80Avanti che la cena sia fenia. —
Se a sta strana risposta el comitente
Sia restà persuaso
No so gnente,
Ma quei che conta el caso
85Dise che 'l zorno drio
A veder el ze andà se l'è partio.
A la barba del progresso
Certi conti gh'è anca adesso,
Come afato el conte Bario,
90O con picolo divario.