El sospiro de Tomaso Canela
|
Edission original: |
Giglio Padovan, Rime in dialetto veneto di Polifemo Acca, Trieste, Appolonio & Caprin, 1875 |
|
Fonte: |
| ← La cremazion | Edission e fonte ▼ | Prefazione ai Sonetti → |
Quando l’Amor vol meterghe la zata,
Can e gato el fa unir soto l’ombrela;
El fa ch’Orlando perda la zavata,
Che deventa Rinaldo una sardela,
E che l’omo più stagno de cervelo
Sporca le braghe pezo d’un putelo.
Una volta anca mi gera de quei
Ch’apena i vede un cotolin che svola,
I core come tanti barbastei1
Ne la speranza de saziar la gola:
E co vedeva certi bei museti
La me zirava più de la Fioreti.
Adesso invece, Cristo benedeto,
No le me passa gnanca per la mente;
Se qualchedun me mostra un bel tocheto,
Lo vardo, e schiao, più no me fazzo arente;
Ringraziando la Vergine Maria
Se un pampalugo2 me lo porta via.
Ma pur, gh’è sta un momento, e lo recordo
Col cuor tuto ingropà sto bruto caso,
Che sul più bel che me credeva sordo,
Via da la recia m’è scampà el bombaso;
E andando in paradiso col balon,
Ò desvodà sto saco de sabion:
Moreta mia, xe un pezzo che te vardo
E che l'amor me bisega nel sen;
Ma essendo vecio lugaro bastardo,
No posso dirte che ti xe ’l mio ben:
No vogio che i me creda ribambio
Nè che i me taca i mocoli da drio.
Co te vedo a teatro, sul balcon,
O se per caso ti me passi arente,
Me sento andar a viole la rason
E del giudizio me scantina el dente;
E co puzo la testa sul cussin
Me bate nel cervelo un svegiarin.
Da qualche tempo ti me rizzi el naso,
Voltando i oci per parer più bela;
Ma un omenon par mio sa in ogni caso
Compatir le fumae d’una putela:
Una mugier senza nissun difeto
No la farave nio3 soto ’l mio teto.
Ah se podesse lusingarme, o cara,
De procurarte una scosseta al cor,
Sonando verso l’alba la chitara
A rischio de becarme un rafredor,
Vorave far la parte de Lindoro
Ch'intona la romanza al so tesoro.
Ma dovendo, pur tropo, renunziar,
Come t’ò dito in una mia sestina,
A l'idea de poderme snanarar4
Vicin la to graziosa testolina,
Prima che sona l’ora del matio
Ciò un baseto nel fronte e va con Dio.
- Note