El teramoto
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Un malinteso | Edission e fonte ▼ | La moda... bombardiera → |
Gastu sentìo Domenega,
Nina, che scossa forte?...
Mi, co mia mama e Càroli,
Semo scampae zo in corte!
Ciò, basta dir che gèrimo
Za tuti quanti in leto...
Quando improviso..., tàchete!...
Càpita quel scosseto!
Co semo stae, figùrite,
Da basso.., al çiel seren..
S'avemo incorto subito
Che no se stava ben
Cussì... senza una cotela
Indosso.., e co quel vento
Che ne meteva i brividi
De fredo e de spavento!
E pò ghe gera el zovene
Del paruchier darente
Che 'l ne tolea per bagolo
Façando l'insolente;
Vardandone le pùpole...,
Disendo çerte cosse...
Che..., se ghe gera el Pàroco,
Se deventava rosse!...
Ma, Nina, cossa credistu
Che 'l sia sto teramoto?...
― Mi?... Digo che 'l xe el Diavolo
Che ne camina soto!...
Lassemo star el diavolo
E le superstizion..,
Perchè, in sta fin de secolo,
Trionfa la rason!
Le convulsion, i tremiti
Che ga sto vecio mondo...
Mi credo che i sia i sintomi
De un mal moral profondo...,
Che de sto mal sia causa
L'intiera umanità
Che proprio insoportabile
La xe da poco in qua!
Co çerte idee politiche,
Soziali e religiose...
Che le revolta el stomego,
La xe una vera crose!
E vustu che pacifico,
El mondo, e indiferente
L'assista a sto spetacolo
De tuta la so zente?..
No, no..., no xe possibile
Che 'l sia pò tanto bon...
Se un dì el ne manda a tombole
El gavarà rason!
― Ti parli come un anzolo..,
Ti par 'na dotoressa...,
Ma de cambiarse i popoli
Par che no i gabia pressa!