Un malinteso
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Un qui pro quo | Edission e fonte ▼ | El teramoto → |
Un bel zorno in Marzaria
Ela andava in sartoria,
Seria, dreta e l'ocio basso...
Curtesin, ma svelto el passo..
Mi ghe digo, avicinandola:
― Xelo libero el so cuor? ―
Ela, alora, francamente
Me risponde: ― Çertamente
Che 'l xe libero..., per cossa? ―
La domanda tuta rossa...
― Perchè mi, senza preamboli,
Ghe vorave far l'amor!..
E cussì... restemo intesi!...
Se va avanti un per de mesi..,
Ma una sera da viçin
Mi ghe vedo un paronçin
Che ghe ofre soridèndoghe
El so brazzo e un mazzetin!!..
Ela ride e açeta!... Alora
Coro là da quela... siora,
Ghe consegno un stramuson
Domandando spiegazion...,
Perchè mi no fazzo el piavolo...
E no fazzo da... lampion!...
Ma culìa no se confonde...,
La me varda e la risponde:
― Lu, sior mio, no ga çervelo
Se la parte ancuo de Otelo
El vol farme!... Se ricordelo
Co'l me ga parlà de amor?!...
Go risposto neto e s'cieto,
E mi qua ghe lo ripeto..
Per le rime..., sissignor:
Che son libera... in amor!
E de amar quanti me comoda
No xe libero el mio cuor? ―