Un qui pro quo
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Riflession semi-patetiche de uno in cimbalis! | Edission e fonte ▼ | Un malinteso → |
(Sto signor in melordina...
Biondo, magro, longo e duro...
Che adasieto se aviçina,
Xe un inglese de sicuro!
Se no 'l volta zo de stra la...
Qua mi ciapo la zornada!
Eco là, che 'l tira drito...,
Che 'l vien proprio da sta banda...
Ancuo lasso el pesse frito..,
A magnar vado in locanda!...
Xe cussì che fa chi pol...)
Ohe!.. Monsiù, volè el gondiol?
Volè ander a remengon
Tu le zor par la çitè?...
Le palais du Canalon,
Sior milord, vu vedarè!..
Ansuit... de sta Venis
Me dirè fort-bien e bis!
(Xelo un muso da sterline!...)
Tre-zolì xe 'l mio gondiol!...
Col coussin.., co le tendine
Epargnet le parasol!...
Avanscè, de ca, monsiur!...
Montè..., sans aver paur!
(Fiol d'un can..., no 'l me dà reta;
No 'l me varda..., no 'l me scolta...
E si parlo in lengua.. preta!..
Che la ris'cia un'altra volta?)
Ohe!... Milord, scusè..., pardon!...
Volè alèr a remengon?...
― No te par che sia za ora
De lassarme un poco in pase?...
De mandarte in to malora..,
Veramente me despiase...,
Me despiase perchè ti
Ti me tol chi sa per chi!...
A remengo.. va ti solo,
Perchè, mi, ghe so da un toco...,
E se vegno qua sul Molo...,
Se no par che sia un... pitoco...,
Te dirò, che nissun senta,
Che me manca la polenta!...
Che mi gera un impiegato
Del Ca.. tasto e po... del Loto,
E che, dopo un çerto fato...,
Go dovesto far fagoto!...
Se mi vogio ancuo magnar …..
Devo vender e impegnar!...
Ma za tuto el bon, el belo
Xe andà al Monte, e no me resta
Che ciapar un bon martelo
E far tochi de sta testa!...
Lassarò sto mondo infame
Prima de morir da fame!...
― Disgrazia!... El me scusa tanto
Se l'ò tolto per un sior!...
No 'l se ofenda... el toga..., intanto!
Sto pocheto el vien dal cuor!...
Povareti e barcarioi...,
Ma nu semo boni fioi! ―
― Grazie, caro..., e te prometo
Che se mai mi podarò...,
Più contento a sto tragheto
Un bel dì ritornarò...
(E co questo..., la zornada
No xe persa.... nè ciapada!..)
Se, pur tropo, stamatina
Un bel granzio go pescà..,
Da magnar la polentina
Qualche nolo vegnarà!...
Ghe vol fede..., e convinzion...,
Co se fa una bona azion!