El vecio da la bancheta
|
Edission original: |
Berto Barbarani, I due canzonieri, Verona, P. Apollonio, 1917 |
|
Fonte: |
| ← El gobo | Edission e fonte ▼ | El segreto de le fameie → |
Ecolo qua! A sta ora chieta, chieta
che le serve e i soldà se guarda in facia
e el grio ghe core drio a la cavaleta,
par contarghe el so amor soto la macia,
un vecio a strapegon su 'na bancheta
el se comoda a pian, che el par che el sbacia1
l'ultimo fià, spassando la piereta
col fassoleto, se de no el se macia.
C'èlo sto vecio? A dimandarghe a lu,
l'à fato tute quante le campagne
e del coraio el ghe ne avea par du;
Ma è passado i bei ani e le cucagne
e no ghe resta che pensarghe su,
come un decoto par le so magagne.
E postando2 el baston così, d'arente,
col pomolo voltà verso la sesa,
guardarse avanti a caminar la gente,
tirando su el tabaco a presa... a presa;
e gh'è le done che vien via contente,
for da la porta a sparagnar3 la spesa,
e gh'è la ferovia che la se sente
col bordel de i stantufi e la pantèsa.4
Dove vala? Lontan... Forsi là in fondo
dove el mar se destira inamorado?
Sto vecion l'à girà par tuto el mondo,
e l'à fato el mestier che fa el soldado,
e l'à fato el mestier del vagabondo;
gh'è vegnù i cavei bianchi, e 'l s'à fermado!
El s'à fermado su s'un quinto pian,
dove fa fredo par de i mesi intieri
e bisogna supiarse su le man,
no podendo supiar sora i pensieri;
dove i amissi no ghe fa bacan,
parchè i par morti tuti quanti ieri,
dove, quando che tira el tramontan,
cioca le carte che le scusa i veri.
Dove i colombi i beca a la finestra,
e a mesogiorno vien 'na pora dona,
a portar du cuciari de minestra;
dove anca la musica l'è seria,
parchè zo in strada l'organo che stona,
el canta la canson de la miseria!
Dopo disnar sto vecio el fa du passi
for da la porta par spassarse un'ora,
el se tol 'na bancheta, el conta i sassi,
discorendo de schei co la malora.
Ma vien che el corpo a furia de strapassi,
da par tute le parte el ghe dolora,
e g'ò paura che coi primi giassi,
su nel so buso, poro vecio, el mora.
E parchè el va a çercar la carità
de porta in porta, el trova de la gente,
che vol spedirlo a la mendicità.
Là gh'è pan, là gh'è vin, gh'è loghi caldi...
Va al ricovaro, vecio! – Nol ghe sente,
parchè lu l'è stà via con Garibaldi!
Tute le foie i è cascade in tera
e gh'è passado su 'na nevegada.
Semo in diçembre e 'l grio che se despera
co la so cavalota inamorada,
drento a la tana el speta primavera...
Ma sto vecio co l'anima ingiassada,
el va sempre a sponsar5 su la so piera
pertegando a pianin la stessa strada.
E la sera del giorno de Nadal,
gran bruto giorno par un desperado
che no 'l g'abia amicissie e 'l staga mal,
dopo che a casa, speta e che te speta
i è vegnudi a çercarlo, i l'à trovado
longo desteso su la so bancheta!
- Note