EPUB   MOBI   PDF   RTF   TXT
Qualità del testo: sto testo el xe conpleto, ma el gà ancora da vegner rileto.

[p. 46 modifica]A dì vinti tre pur de questo mexe de mazo al alba del zorno si fo trovà una cava ala Calegaria, a presso dove che iera sta trovà le altre, e azò sapiate, questa Calegaria si xe apresso del palazo de l'imperador; abiando nui trovada questa cava, subito nui de la tera desemo fuogo dentro, e tuta tosto fo bruxada, e bruxada che la fo, subito quela si cazete,1 e sofegò soto alcuni turchi che se trovò esser soto, e fone tolto do de queli, vivi, fuora de la cava, i qual si iera i maistri de quela cava. I diti do maistri si fo tormentadi da griexi, e confessò queli, dove che iera le altre cave, e da posa che i ave confesà, li fo [p. 47 modifica]taiada la testa, e queli so corpi si fo butadi zoxo de le mure da la banda da tera, dove che iera el campo del turco; e lor turchi, che vete questi so turchi butadi zoxo de le mure, si l'ave forte a mal, e desdegnosse forte verso griexi, e nui taliani. Pur ancora in questo medemo zorno a una hora avanti zorno vene uno bregantin suxo per el dardanelo, el qual bregantin si iera armado de vestimenti a la turchesca, e i è sta stado questo, mandado in l'arzipelago per iscontrar la nostra armada, che vignisse tosto suxo, e dire che Costantinopoli ancora se tegnia forte. Ma l'armada del turco, che iera sorta a le colone, sentì a remizar questo bregantin fortemente, e dubitò non fosse qualche antivarda de la nostra armada, perchè lor si saveva ben che quel non iera fusto de turchi, e però la dita armada del turco, si se mosse da le colone, e vene in ver questo bregantin; ma come questo bregantin si fo per mezo la cadena del porto, a quelo i la fo averta, e intrò in porto con salvamento, e l'armada del turcho vedando questo, i retornò in driedo con tuta la sua armada, e andò a sorzer al suo luogo uxado, ma nui de l'armada nostra tuti si iera a le sue poste, e armadi a muodo uxado, per dubito, che la dita armada del turco, non devegnisse a investir a la cadena, (e) stessemo tuti in arme per in fina a una hora e meza de zorno, e poi tuti se dexarmasemo; altro per hozi non fo, ma ben per la tera iera uno gran campana martelo, per asunar persone a la marina per dubito de l'armada, come vi ho dito. Da tera avessemo ancuo2 asai bombarde in le mure, e butò zoxo parechi passa de muro, e tosto nui fevemo otimi repari; per questo zorno avesemo gran travaio, e afano asai cusì da mar, come da la banda da tera dal campo. —



Note a cura de Enrico Cornet (1856)
  1. rovinò.
  2. quest'oggi (hanc hodie).
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikisource.org/w/index.php?title=Giornale_dell%27assedio_di_Costantinopoli_1453/41&oldid=41771"