I colombi de sa' Marco
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Su la tomba dei fradei Bandiera | Edission e fonte ▼ | La Tombola in Piazza → |
Ala Signorina Maria nob. Turzanka
Quando ve vedo, o forestiere bionde
Co in man la Guida e al fianco el canocial,
Come sirene vegnir su da le onde,
Reçitarve vorave un madrigal.
Se' bele, inzenociae drento le Cese
Davanti a le Madone de Tizian,
E brave a tabeldò a l'Hôtel Ingrese,
E bone ai ponci del Cafè Florian.
Ma, a dir la verità, me piasè megio
Quando ve vedo in Piazza çircondae
De colombi e de... merli; quei, de mègio
Tanto golosi; e sti altri, de sfogiae...
Questi, (fra i quai ghe so' anca mi), i se ris'cia
A butarve in françese un tresolì,
Ma po' sentindo che el sì vostro el fis'cia
Un poco, e 'l stona col bel nostro si;
O per paura de quel bruto muso
Longo che arente e sempre a drio ve stà,
Savendo che l'afar ghe andaria sbuso,
Pian pian, uno a la volta, i ghe la dà.
Mi resto, infin che da la Tore i Mori
Co i so bravi martei bate le dò,
Per vèdar, come 'na piova de fiori,
Da i Palazzi i colombi svolar zo.
― «Ocio, Signora, che i ghe vien adosso
E i ghe sporca la blusa e 'l capelin...»
(No la me scolta, e col so bel scartosso
La ghe darave anca el so coresin)...
Mi gò osservà che, più ghe piase quei
Dal colo longo; ma no so el perchè...
Diseva un tal: Se i fusse tanti osei
Rostii sul speo, ah! co magnar da re!...
Oh, se anca mi, bogia de un mondo can,
Un colombo podesse deventar...
Per svolarve, o Signore, in-te-le man,
E farme da vualtre cocolar!
Vegnirve sui zenoci e su le spale!
Meter el beco in-te quel bel bochin,
Bever el vostro spuo... e po' verzer le ale,
Svolar, e dirve: «Adieù, Madam Bibin!...»
Co gusto mato nol sarave quelo!
Svolar su, su, fin sora el Campaniel...
E l'anzolo basar, tocar el cielo
E po cascar... magari al gran Hôtel!
Ma se me capitasse qualche striga,
Bruta, vecia, antipatica e sdentada,
(Scusème, ma bisogna che lo diga),
Mi ghe farave in boca 'na schitada...