I debiti
Capricio
per le nozze de la N.D. Camilla Sagredo
col Nob. Sig. Francesco Raspi
|
XIX secolo
|
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
I DEBITI
CAPRICIO
PER LE NOZZE DE LA N. D. CAMILLA SAGREDO
COL NOB. SIG. FRANCESCO RASPI.
Camileta - benedeta,
Dei dì nostri amirazion,
Messa drento - in t'un convento
4Là ti à avudo educazion.
Mile cose - vantagiose
Là s'impara: chi nol sa?
Solamente - no se sente
8A parlar de società.
Ti xe bela - ma putela;
Le putele à da imparar.
Via te degna - che te insegna
12Quel che al mondo s'à da far.
Ma cospeto! - se me meto
Tuto a dir quel che se pol,
La capisso - no finisso,
16Perchè un'opera ghe vol;
Ma a to pare - ma a to mare
Dir el resto lassarò,
Che mi, sposa, - d'una cosa
20Sola e curta parlarò.
Se stimada - sempre e amada
I to dì ti vol passar,
Da ti stessa - date pressa
24I to debiti a pagar.
Le persone - che xe bone
Le xe atente a sto dover;
Xe inonesto - a ognun molesto
28Chi no paga chi à da aver.
Ti sbufoni? - ti minchioni
Chi per ben t'à consegià?
Pur l'è vera! - su la tera
32Vari debiti se dà.
No te ofendo - che no intendo
Bezzi o zogo ricordar.
Quei, oimei! - xe mo de quei
36Che mi sì me fa zurlar.
Ma ti dona - ti parona,
Ti un dì mare, e ancuo muger,
Quai doveri! - quanto seri
40Ai to zorni ti à da aver!
Dona e dama? - aquista fama
De bon cuor, de urbanità
Co un contegno - de ti degno
44Senza asprezza o vanità.
Ti parona? - siime bona
Con chi serve note e dì,
Che anca lori - i servitori
48Xe de carne come ti.
La to mama? - tuti l'ama,
Tuti loda el so bon cuor.
Se la imiti - ti à i so driti
52Su la lode e su l'amor.
Mare un zorno? - i fioli atorno
Te starà con afezion.
Camileta - da ti i aspeta
56La so prima educazion.
Ti consorte? - la to sorte
Da Chechin dipendarà;
Sii ubidiente - compiacente,
60E lu sempre t'amarà:
Se un maleto - el tien in leto,
Se un pensier mal lo fa star,
Co premura - ti procura
64El to sposo consolar.
Chi ben ama - la so fiama
Sempre viva ga nel sen:
Sia el to sposo - el to moroso,
68El to amigo, e andarà ben.
L'astu intesa? - t'ogio ofesa?
Songio un stolido, un minchion?
Gogio torto? - pensio storto?
72O piutosto goi rason?
Ma sposeta - benedeta,
Go mo torto, e rason ti;
Che sta storia - ti a memoria
76Ti la sa megio de mi.
Ti à talento, - e se 'l convento
Sta lizion no t'à insegnà,
Ti lezendo - e riflettendo
80Da to posta ti la sa.
Sì perdia, - mi sbregaria
Quel che ò scrito... e alora po?
Sta zornada - xe cantada
84Da tant'altri; e tasarò?
No, no vogio; - e po no sogio
Quanto bona ti xe ti?
Ti xe bona - e ben, perdona
88Se ò mal dito a dir cussì;
Anzi aceta - Camileta,
Anca el voto del mio cuor.
Che i to ani - senza afani
92Scora in brazzo de l'amor!
.jpg)