I tre Linaroli
|
Edission original: |
Pietro Buratti, Poesie e satire di Pietro Buratti veneziano, corredato di note preliminari ed annotazioni scritte dallo stesso autore, Amsterdam, J. Loocke, e figlio, 1823 |
|
Fonte: |
| ← Barbareide seconda | Edission e fonte ▼ | Risposta all'Anonimo → |
La singolare combinazione che v'abbiano a Venezia tre giovanotti venditori di lino al minuto che senza educazione di sorte, e sprovisti di tutte le qualità necessarie per comparire in società, si credano in diritto di mostrarsi nel mondo galante, e di passare per uomini d'avventure, diede argomento al poeta di esercitare il suo flagello satirico. Chi li conosce personalmente, può gustare la verità del quadro niente esagerato, e in questa parte il poeta si lusinga d'aver colpito nel segno.
Xè da un ano che ò ligà
La mia musa in t'un canton
Da Carleto spaventà
Degno fio de sior Simon.
Xè da un ano che son quieto
Che no togo pena in man
Che rispeto Barbareto
Zentilomo Venezian.
Zà me gera persuaso
Ch'el mestier del maldicente
Fa saltar la mosca al naso
Ne corege mai la zente
Che in sto secolo imoral
In sti tempi de bulae
Pol vegnirme adosso el mal
De un bon fraco de legnae.
Ma la classe dei busoni
Se và tanto propagando
Che no vogio star de bando
Ne gratarne più i cogioni.
Che vergogna xè mai questa
De veder tre licamone
Che s'à messo el grilo in testa
De scaldar le nostre done.
Che solene impertinenza
De veder tre linaroli
Che se crede lori soli
Del bon ton la quinta essenza
I se trova sempre a spasso
In teatro, da Florian
I xè lori che fa chiasso
Co le mode da Milan.
Co tre musi da cogioni
Da ignoranti boteghieri
I vol far da galantoni
E no i xè che putanieri.
Senza aver per un momento
Conossudo el cuor de l'omo
Senza un poco de talento
Per gustar del mondo el tomo.
I se crede professori
Ne i misteri de l'amor
I ve spassa da dotori
I secreti d'ogni cuor.
I sà dirve: la tel dona
La se leva a la tal ora
La se lava la so mona
La sta in casa, la vien fora.
Ghe xè adesso el tal zerbin
Che ghe stà sempre vicin
Ghe xè un'altro cortesan
Che ghe tira da lontan.
Ghe venudo da Parigi
El tal abito de lana
Come mai tanti luigi
La xè donca una putana.
I responde con mistero
Qualche mezza paroleta
Ghe del falso, ghe del vero
I ve ride con grazieta.
I ve dise: l'ò sorpresa
Che la gera ancora in leto
Che bel pelo su la sfesa
Che tetine? che culeto!
Sì signori, col deolin
La podè forsi tocar
Ghe podè forsi el martin
De resbogo palpugnar.
Ma per vù altri no ghe sguazzo
No se averse mai la coca
E per solito ve toca
De menarve soli el cazzo.
Caporion de sti signori
De sti veri licaori
Xè quel mona de Carleto 1
L'è quel'orbo maledeto.
Lù xè l'omo de la moda
Lù xè l'omo universal
Co un cervelo pien de broda
Lù se crede tuto sal.
In famegia lù xè quelo
Che dà lege, che dà ton
Degno fruto del so oselo
Lo rispeta sior Simon.
In comercio nol la cede
Al famoso Revedin 2
In politica el ghe vede
El gà un tato soprafin.
S'el facesse manco abuso
De la cossa che xè quà 3
Con quei ochi con quel muso
Coi raporti che lù gà,
Saria proprio un incantesimo
De sentirlo ragionar
Fin ne l'ultimo centesimo
De sentirlo a calcolar.
Ma chi pol sofrir per Dio
Che ghe vada sempre drio
A la cossa che xè quà
Quela cosa che xè là.
Con quel ton de signoria
Anca el soldo lu sparagna
L'è un avaro l'è un arpia
L'è de fondo una lasagna. 4
Se ghe dè le carte in man
L'è anca alora zarlatan
Con un certo far da bulo
Che ve rompe proprio el culo.
Poche volte lù za perde
Da fortuna secondà
Col favor de certe merde
Che xè indegne in società.
Ma po dove l'è famoso
Dove el supera ogn'intopo
Dove el core de galopo
Senza darse mai riposo,
L'è nel regno de quel Dio
Che in Citera gà el so nio
Vogio dir de quel regazzo
Che ne fa tirar el cazzo.
L'è nel regno de ste done
Che se chiama de cartelo
De ste nostre galantone
Che xè fate per l'oselo.
Ghe vol altro anoverar
Le so grazie i so bomò
Col se mete a cortegiar
Col và tuto in squaquachiò.
El ghe tira su una spala 5
El ghe sporse el culo in fora
Co una ciera cussì zala
El ghe dise ch'el le adora.
Ma la dona no ghe abada
La ghe volta el muso in là
E lu cresse la secada
Co la cossa che xè quà.
Da là un poco el và da un altra
E da quela el zira bordo
Per andar da una più scaltra
Che lo trata da balordo.
Sul più belo l'è bandio 6
Da le istesse buzzerone
Che xè stufe d'aver drio
Sto insolente licamone.
E lù alora desperà
El và in cerca de putane
El se cassa in carampane
Col so oselo spolverà.
Digo cossa a pochi nota
Ma el poeta putanier
La savesto da Carlota
Che xè vaca de mestier.
Senza un poco de piumin
No ghe tira el so bimbin
E bisogna che la dona
Spolverà lo toga in mona. 7
Ma lassemo sto cogion
E parlemo del so amigo
De quel'altro gran campion
Che se chiama Gigi Rigo 8
Linariol de prima classe
Co un negozio ben fornio
E che vende un bezzo d'asse
In contrada de San Lio.
No credè che per malizia
Mi me meta a criticar
Che me piase a far giustizia
E col mal el ben pesar.
L'è de fondo un galantomo
Nol gà gnente del borioso
L'è corente l'è bon omo
Co so pare rispetoso.
No l'è arpia no l'è carogna
Come Carlo so colega
Senza crederla vergogna
El ghe abada a la botega.
Ma anca lù mo povereto
Con quel muso el gà la paca
De passar per idoleto
De voler chiavar a maca.
Se ghe sente un mio lontan
El fetor, che lassa el banco
Ma el vol far da cortesan
Da galante, da omo franco.
Nol gà un pelo che sia storto
El vien fora un calalin
Per far ben da cascamorto
El consulta el figurin.
Le bochete ben stocae
Come tuti i zizoloti
Le braghesse recamae
Frach, spenser, rodengoti.
Gabanon coi colaroni
Stivai fati a san Moisè 9
Man in testa o sui cogioni 10
Pani fini de luviè.
Va ben tuto: l'è un signor
Ma col gà ste cosse a torno
Le ghe casca, le ghe mor
No le cava proprio un corno.
Co l'averse quela boca
E ch'el mostra quei dentazzi
Se capisse che l'è un coca
E ch'el vien da visdecazzi.
Se capisse che l'è nato
Come i fonghi nasse in prà
E che insorma no l'è fato
Per le bele società.
Nonostante el se inzegnatola
El va avanti come el pol
E ste done le zogatola
Co sto caro linariol.
Le ghe dise con prudenza
Le so smanie, i so amorini
Le ghe dise in confidenza
Sta matina ò fato nini.
Ma l'ò fati senza voja
Za ti sà ch'el paga mal 11
No l'è gusto far da troja
Per un scarso mensual.
Gigi alora co bon sesto
El ghe parla, el ghe ragiona
El ghe palpa un poco el cesto
El ghe furega la mona.
El tra salti da quajoto
Nol pol star su la carega
El deventa mezzo coto
E cert'une no ghe nega,
Per pagarlo del so zelo
Perchè el fazza da rufian
De portarghe su l'oselo
I favori de la man.
Parlo zà de una signora
De natura assae cortese
Che da vaca el mondo onora
Che se afita un tanto al mese.
Che xe stada scozzonada
In principio da Michieli
E che al turco xè passada
Poco dopo Beltrameli.
Vardè come senza stento
A ingrossarme l'argomento
El so posto in rima vol
Anca st'altro linariol.
Terzo eroe de sti campioni
Che no trova mone a basa
E che gà botega in casa
Su la riva dei schiavoni.
Feghe largo a st'altro mato
Duro duro, lindo lindo
Che sigila el triunvirato
Co la parte de Florindo.
Da per tuto lù se cazza
Co la paca d'esser belo
Ma el gà un spirito da piazza
El gà bote da Castelo.
Quel so pare povereto
El savaria per sto fio
Che no vol ararghe dreto
Che gà el banco in tel da drio.
E ghe toca tuto el zorno
Per lù solo tambascar
Per sto mato, che và intorno
Co le bele a smorosar.
Ma s'el trova l'insolente
No ghe omo più prudente
E per queste bagatele
No l'espone la so pele.
L'è de fondo un gran bon puto
El gà el cuor de marzapan
E col vede el tempo bruto
El la fa da cortesan.
Nol se pica de violenza
El ghe cede la so dona
E con tuta indiferenza
El li lassa andar in mona.
Linarioli perdonè
S'el poeta s'à sfogà
Mi son solo e vù se tre
E saria tropa viltà
Se gavessi el bel talento
De aspetarme in t'un canton
Per po darme a tradimento
La riceta del baston.
- ↑ [p. 94]Carlo Zoppetti, uno dei tre linaroli contro il quale preventivamente aveva scritto il poeta un Sonetto, cui fu risposto dal Zoppetti dietro un dialogo rissentito col medesimo.
- ↑ [p. 94]Uno dei più ricchi banchieri di Venezia.
- ↑ [p. 94]Intercalare favorito del Sig. Carletto.
- ↑ [p. 94]Termine vernacolo, sinonimo di esaggeratore.
- ↑ [p. 94]Grazie sue particolari quando si ringaluzza con qualche bella.
- ↑ [p. 94]La Molinari nell'ultimo accomodamento col Turco Pini, l'aveva bandito di casa.
- ↑ [p. 94]Stranezza, credo, affatto nuova nelle tante che si danno in questo genere.
- ↑ [p. 94]Gigi invece di Luigi, abbreviatura graziosa.
- ↑ [p. 94]Calzolaio di moda allora.
- ↑ [p. 94]Sconcia abitudine di tutti i giovanotti del buon tempo.
- ↑ [p. 94]Discorsi della Molinari con Rigo quando era protetta da Pini spilorcio di prima classe, orientale di nascita, e chiamato per questo il Turco.