Il Milione/089
|
Edission original: |
Il Milione veneto : ms. CM 211 della Biblioteca civica di Padova, |
|
Fonte: |
http://www.classicitaliani.it/duecento/Polo_Milione_01.htm |
| ← CAPITOLO LXXXVIII | Edission e fonte ▼ | CAPITOLO XC → |
- Del regniame de Margara, dove abita el fiol del Grande Chaan.
Quando l'omo se parte della zità de Chazianfu, el chavalcha oto zornade per ponente, trovando tuta fiata zità e chastelle e chanpi, et ène grandenisima quantità de moreri per i vermi che fano la seda.
Le giente èno tuta idolatria.
El ve n'è venaxion de bestie et d'oxielli asai.
In chavo de queste oto zornade se trova una nobelle zità del richo e nobile regniame che à nome Margara, in la qual è re el fio del Gran Chaan che à nome Mangala.
La zente de quella zità è idolatri.
Et ène abundanzia de merchadantie et de seda, et de tute quelle chosse che bixognia a chorpo umano.
De fuora della zità è el palazo de Mangala, in uno piano ch'è murado atorno atorno de un grosso muro e forte, che volze ben zinque meia.
Et è entro quel muro e fiumi e lagi e fontane asai.
Lo muro è tuto merlato.
In mezo de quel muro è uno palaxio belletisimo, lavorato dentro a oro batuto.
Atorno quel muro demora l'oste del re Mangala, ed è gran solazo della venaxone che se trova in quel luogo.