Il Vangelo di S. Matteo volgarizzato in dialetto veneziano/Capo XIII
|
Edission original: | |
|
Fonte: |
| ← Capo XII | Edission e fonte ▼ | Capo XIV → |
IN quel zorno Gesù vegnindo fora de casa, el se sentava su la riva del mar.
2 E se ga ingrumà atorno de lu una gran fraca de popolo, tanto che l'ha credesto de montar su una barca e là de sentarse: e tuta quela zente s'ha fermà su la riva.
3 El ga tacà discorso co lori de tante cosse in zergo, che vol dir co de le parabole, disendo: Eco che un ortolan xe andà per semenar.
4 E col gera drio a butar de qua e de là semenze, ghe ne xe cascà dei pizzegheti de longo su la strada, e xe corsi in bota i osei de l'aria, e i se li ga becolai.
5 Dei altri pizzegheti xe cascai in certi loghi, che gaveva dei sassi, e no ghe gera sta gran tera: e in bota i ga butà fora, perchè el teren no gera fondo.
6 Ma co s'ha levà el sol el ga incandio quei buti: e i s'ha secà, perchè no i gaveva ancora fato bone raise.
7 Un altro pizzego el xe andà in mezo ai spini: e i spini xe cressui, e i ga sofegà le semenze.
8 E finalmente st'altro xe cascà sora una tera bona: e ga fato fruto de cento per uno, e de qua de sessanta, e de la de trenta.
9 Chi ga bone rechie me intenda.
10 E co i so apostoli ghe xe andai arente i ga dimandà: Per cossa parlistu ti co lori cussì in zergo, che vol dir co le parabole?
11 Lu rispondendo, ga dito: Perchè a vu altri ve xe permesso de capir i misteri del regno, che xe in cielo: ma lori no i lo ga sto permesso.
12 Questo ghe sarà dà a chi savarà doperarlo pulito, e se catarà a nuar nel'abondanza: ma el ghe sarà portà via a colù, che no gavarà talento de tegnirghene conto.
13 Eco per cossa che mi discoro in zergo co lori doperando le parabole: perchè vardando no i vede, scoltando no i sente, e no i capisse.
14 Proprio lori fa, che sia vero quel, che ga indovinà Isaia: Sentirè co le vostre rechie, e no capirè gnanca una fregola: varderè fisso coi vostri ochi, e no vederè gnente, gnanca una schianta.
15 Se pol dir, che sto popolo ga un cuor fodrà de lardo, e xe duro de rechia, e ga i ochi sarai: e tuto, perchè no i veda coi ochi, no i senta co le rechie, no i capissa col cuor, e i se converta, e mi li guarissa.
16 Ma i vostri ochi xe fortunai de veder, e le vostre rechie de scoltar.
17 Ve digo mi in verità, che un bon numero de profeti, e un bon numero de giusti ga abuo vogia de veder quel, che vede vualtri, e no i lo ga visto: e de scoltar quel, che scoltè vualtri, e no i lo ga ascoltà.
18 Sentì dunque vualtri la parabola de l'omo, che semena.
19 A tuti quei, che scolta la parola del regno de Dio, e no ghe bada, ghe capita el malano, e el ghe porta via quel, che gera sta semenà in tel sol cuor: costù xe quelo, che ga ricevesto la semenza senza fermarse su la strada.
20 Colù, che riceve la semenza in mezo de le piere, xe quelo, che scolta po la parola, e in bota ghe fa aceto co alegria:
21 Ma nol ga co lu la raise, e el ga vita curta. E co capita le disgrazie e le cativerie dei omeni, e le calunie per causa de la parola, in bota el se scandaliza.
22 Colù, che riceve la semenza tra mezo i spini, el xe quelo, che scolta la parola; ma la pressa, che se dà sto secolo, e la smania dei bezzi, che lo orba ghe sofega la parola, e la ghe deventa seca, e roba morta.
23 Ma colù, che mete la so semenza in tuna tera bona, xe po quelo, che scolta la parola, ch'el se la tien ficada in tela mente, e la ghe da fruto, e la ghe rende de le volte el cento, o el sessanta, o el trenta per uno.
24 A lori el ga po parlà in zergo cussì co un altra parabola: El regno, che xe in cielo el ghe somegia a un omo, che ga semenà nel so campo una bona semenza.
25 Ma che intanto che i omeni ga chiapà sono, ghe xe andà adosso el nemigo, el ga semenà de l'erba cativa, che se ghe dise zizania, tra mezo el gran, e el xe scampà via.
26 Co l'erba po ga dà suso, e xe capità el tempo de far fruto, s'ha visto a dar suso anca la zizania.
27 Alora i servi del capo de casa i ghe xe andai arente a dimandarghe, e i ga dito: Signor, no gavè vu semenà de la bona semenza in tel vostro campo? E cossa vol dir, che ghe xe sta erba mata?
28 E lu ga risposto: Oh bela! Sarà sta un nemigo, che gaverà fato vegnir sta missianza. E i servi ga dito: Voleu, che andemo a rancurarla?
29 E lu ga risposto: No star a far sta cossa, perchè rancurando la zizania, podaressi co quela strassinar via anca el gran.
30 Lassè pur, che i cressa tuti do fin al tempo de sunar tuto, e co se farà el racolto ghe dirò ai contadini: Despiantè prima de tuto la zizania, e lighela a mazzi per brusarla, rancurè po el gran, e metelo in tel mio graner.
31 El ga fato sentir po st'altra parabola: El regno, che xe in cielo el ghe somegia a un gran de senape, che un omo ga chiapà, e el ga semenà in tel so campo.
32 La xe la più picinina de tute le semenze: ma co la xe cressua, la xe più granda de tute l'erbe, e la deventa un albero, e fina i osei de l'aria i va a repossar sora de le so rame.
33 El ga dito anca st'altra parabola. El regno, che xe in cielo el ghe somegia a un toco de levà, che una dona missia co tre stara de farina, fina che la xe tuta cressua.
34 Tute ste cosse Gesù ghe l'ha dite a quei grumi de zente cussì in zergo, che vol dir co le parabole: e mai no ghe parlava a lori senza parabole.
35 El voleva, che se vedesse quelo, che gavea dito el profeta: Averzirè la mia boca in parabola, scoverzirò cosse, che xe stae sconte dal principio del mondo.
36 Alora Gesù ga mandà via el popolo, e el xe tornà a casa e iso Apostoli ghe xe andai arente, dimandandoghe, che el spiegasse la parabola de la zizania in tel campo.
37 E lu ga risposto: Quelo, che semena la bona semenza, xe el Fio de l'omo.
38 El campo, xe el mondo. La bona semenza, xe i fioi del regno. La zizania po, xe i fioi de l'omo cativo.
39 El nemigo, che la ga semenada, el xe el diavolo. El racolto, xe el fin del mondo: e i contadini, che suna el gran, i xe i anzoli.
40 Donca, come che se rancura la zizania, e che la se brusa: cussì nasserà, co sarà per finir el secolo.
41 El Fio de l'omo mandarà zoso i so anzoli, e i torà via dal so regno tuti i scandali, e i pararà via tuti colori, che fa baronae:
42 E i sarà butai in tel forno de fogo, dove ghe xe susti, e scricolar de denti.
43 Alora le aneme bone le luserà cofà el sol in tel regno de so Pare. Chi ga bon capir, capissa.
44 Dirò un'altra cossa: Che el regno, che xe in cielo el ghe somegia a un tesoro sconto in tun campo: un omo lo ga catà sto tesoro, el lo ga sconto, e tuto alegro el va, el vende tuto quelo, ch'el ga, e el compra quel campo.
45 El regno, che xe in cielo el ghe somegia po anca a un mercante, che va in cerca de perle bone.
46 E col ga catà una perla preziosa, che costa bezzi, el core, el vende tuto quelo, ch'el ga, e el la compra.
47 E anca el ghe somegia el regno, che xe in cielo a una rede butada in mar, che chiapa tanta sorte de pessi.
48 Co la xe stada ben piena, i pescaori tirandola fora, e metendose a sentarse sui sabioni, i cernisse i pessi boni, e i li mete drento dei canestri, e i buta via i cativi.
49 Cussì nasserà co sarà el fin dei secoli: vegnirà i anzoli, e i baroni sarà tegnui separai da le aneme bone,
50 E i sarà butai in tela fornasa de fogo, in dove ghe xe susti, e che scricola i denti.
51 Gaveu capio vualtri tute ste cosse? Sior si, i ga risposto.
52 E lu ga tornà dir: Per questo un Scriba, che gabia imparà cossa che xe el regno del cielo, ghe somegia a un pare de famegia, che cava fora da la so dispensa roba nova e roba usa.
53 Co Gesù ga finio ste parabole, el xe andà via da de là.
54 E tornà al so paese, l'insegnava in tele so sinagoghe, e tuti restava maravegiai, e i diseva: Come mai galo costù tanto saver, e el pol far tanti miracoli?
55 Nol xe el fio de un artesan? So mare no la xe quela, che se chiama Maria? I so fradei no i xe quei, che ga nome Giacomo, Isepo, Simon, e Giuda?
56 E no le xe co nualtri tute le so sorele? Da dove donca ghe xe vegnuo a costù tute ste gran cosse?
57 E tuti restava de lu scandalezai. Ma Gesù ga dito a lori: Un profeta no xe senza onor, nome che nela so patria, e in casa soa.
58 E el ga fato qua pochi miracoli per la rason che i gera increduli.