Il vino caduto nell'acqua
|
Edission original: |
Poeti antichi del dialetto veneziano, Volume II: Poesie di Maffeo Veniero arcivescovo di Corfù e di altri, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
| Edission e fonte ▼ |
In st'aqua de purisimo cristal
Vedo i balassi e i lucidi rubini;
Fati da giozze de diversi vini,
Che par ch'i pianza a vederme a star mal.
In ste zogie, in ste perle oriental
Ghe ride mile Amori picenini,
Che con quei cari gesti da putini
Par ch'i me fazza intorno un carneval.
Porta la vista sto tributo al cuor,
Che al sentire sta insolita dolcezza
El me manda ogni spirito in amor.
Quela che, san, m'à usà tanta fierezza
Porìa ben farme atorno ogni saor
Che gnente curarìa la so' belezza.