L'Aurora
|
Edission original: |
Marco Pescante, Saggio di poesie veneziane, Venezia, dalla tipografia di Luigi Plet, 1835 |
|
Fonte: |
| ← POESIE DI VARIO GENERE | Edission e fonte ▼ | XI. La Dôna → |
X.
Sta matina, mia bela Nineta,
Mi t'ò visto puzà sul balcon;
Ti parevi una stela cometa
4Cola coa butà zò a picolon.
Ti chiapavi quel bel venteselo,
Che i cavei sparpagiando te andava,
E 'l to viso pareva più belo
8Del'Aurora, che apena spuntava
Ma ti avevi po in testa un bel fiore
Tanto ben comodà in tuna parte,
Che de Venere madre d'amore
12Megio assai ti parevi a vardarte.
A quel'ora cussì bonoriva,
Meza spogia, quel bel zefireto
Ogni tanto pian pian te scovriva
16Le to spale, el to colo, el to pêto.
Quele spale, che tanto ben fate
No ghe n'à piturà Rafael,
Quel to colo più bianco del late,
20Quel bel pêto più dolce del miel.
Tuti in rùzola (oh! quadro stupendo)
Mile Osèi svolazzandote in fazza
Me pareva che i andasse disendo
24Mo co bela che xe sta ragazza!
Me pareva che contro el so uso
Anca el sol per vegnirte a vardar,
Curioseto scovrendose el muso
28Co più freta el sortisse dal mar.
L'è venudo el sior Febo, e i so cochi
A portar el gran chiaro lassù,
Ma ti za nel mio cuor, nei mi ochi
32Ti facevi più chiaro de lu.
Mi za al solito solo soleto
Spazzizava su e zo per el prà,
Profitando co un caro libreto
36De la pipa, che ò sempre impizzà.
Ma nel vèdarte... oh Dio! mo che cocola!...
Me son messo a cigar per el pian:
Eh! ma ti no ti à inteso una silaba,
40Perchè tropo te gera lontan!
Te butava dei basi, e coi gesti
Te indicava quel ben che te vogio...
No ti à visto nè mi, nè i mi sesti,
44Perchè i albori gera d'imbrogio.
Palesarte voleva el mio amore
Prossimandome a tanta beltà,
Ma per strada me xe mancà el cuore,
48E ò fenio col restare incantà.
Mo che Aurora! che zorno beato!
No mel scordo, mia vita, sto dì...
Ah! se pò l'amor mio te xe grato,
52Chi sarà più felice de mi?