Verxi el menu prinsipałe

Wikisource β

L'indeciso

EPUB silk icon.svg EPUB  Mobi icon.svg MOBI  Pdf by mimooh.svg PDF  Farm-Fresh file extension rtf.png RTF  Text-txt.svg TXT
75%.svg
Qualità del testo: sto testo el xe conpleto, ma el gà ancora da vegner rileto.
L'indeciso
XX secolo
Edission e fonte ▼
[p. 156 modifica]
L'INDECISO.


Xe proprio un tremendo quesito
Che perder me fa l'apetito.
La bionda opur la rossa opur la mora?
No posso risolverme ancora,
Deciderme proprio no so.

La mora la xe un strùcolo,1
Neri oci e denti bianchi;
La ridi e la te ciàcola2
Che mai no ti te stanchi.
La bionda la sospira
Che un'angiola la par;
La rossa la ve inpira3
Un muso da basar.

Tremendo, tremendo quesito
Che perder me fa l'apetito.
La bionda opur la mora opur la rossa?
La xe una question tropo grossa,
Deciderme proprio no so.

[p. 157 modifica]


La mora ridi: «Guardilo,
Che presto che 'l se infiama!»
La bionda disi timida:
«La parli cola mama».
La rossa, sta mostricia,4
Col suo naseto in su,
La sta a sentirme, seria,
Po la me fa: «Cucù!»

Xe proprio tremendo el quesito
Che perder me fa l'apetito.
La rossa, opur la mora, opur la bionda?
Question tormentosa e profonda
Che proprio risolver no so.

Deme del cagadubi,
Deme dell'indeciso,
Davanti al suo soriso
Ragion ben me darè.
Sarìa rabià anca Pàride
A aver un pomo solo,
Quando le passa al molo
A brazzo tute tre.

Tremendo, tremendo quesito
Che perder me fa l'apetito!
La bionda opur la rossa opur la mora?
Sposèmene una, in malora!
Son pronto a sposar le altre do.



Note
  1. strùcolo, specie di pasta dolce, metaforicamente vale: grassoccia, paffutella. Il vocabolo è frequente, in questo senso, anche nei poeti veneziani
  2. ciàcola, chiacchiera
  3. inpira, inpirar el muso, arricciare il muso.
  4. mostricia, birbacciona, birichina.