L'istà campestre e citadin
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| ← LA PRIMAVERA | Edission e fonte ▼ | L'AUTUNO → |
1Dala cima d'un vechio carober
Co un'ose che ve seca i... me capì,
Publica la cigala a più poder
Che dell'istà tornai xe i boni dì,
La rana dal paltan dise l'istesso,
Dele bestie cussì tuto el complesso.
2Strepita pur cigala inanemada,
Canta pur racoleta spiritosa,
Finchè dando una o l'altra una crepada,
No sentirò sta musica penosa,
Ma mi che stago ben tanto in cità,
Pensa se vegno via perchè xe istà!
3Se 'l zorno qua no vedo a vegnir fora,
E a depenzerse 'l ciel co più colori,
Se osei no ascolto a saludar l'aurora,
Che alegra a l'aparir l'erbete, e i fiori,
Se 'l matutin baritono no sento
D'un aseno che canta, o dell'armento;
4Cossa m'importa a mi, se facilmente
Posso trovar pienissimi compensi,
E ste belezze che no stimo gnente,
Ghe n'ò che le sorpassa in tuti i sensi,
E a l'alba, e a mezzo zorno, e su la sera,
Godo dei passatempi a centenera.
5Xe la delizia de chi sta in campagna
L'insidiarghe la vita a l'inocente
Passaroto cordial, che la compagna
Cerca trovarse no temendo gnente,
E per questi va a l'apice el solazzo
Quando casca el meschin drento del lazzo.
6Qua invece l'oselae xe d'altra sorte,
E i merloti, che casca in quela rede,
Barbaramente no vien trati a morte,
E invece a tripudiar qua se li vede,
Perchè quando le pene i ha ben lassà
Se averze 'l lazzo, e i resta in libertà.
7Co tuto l'entusiasmo a decantar
Sento le passegiae sentimentali,
Che proteti dall'ombra se va a far
Quando più scalda el sol da certi tali,
E ascoltandoli lori i par decisi
A no sperar quei gusti ai campi elisi.
8E da nu no ghe xe forsi altretanto
Per el studioso, e l'omo inamorà,
Ombrosi siti, e solitari tanto?
No gavemo anca nu fora, e in cità,
E no se vede forsi andar vaganti
Sapienti, disperai, mami, e galanti?
9Quando Fetonte la quadriga smonta,
E precede la note un zefireto,
Qualche onesta Napea se vede pronta
Sortir al fianco de l'amato ogeto.
E sti passegi, e l'ombre ha tal virtù.
Che quel par un parente, e no l'è lu.
10Longo la riva d'un tranquilo fiume
Se sente a stirachiar crome galanti
Quel fervido amator che ga el costume
De starghe a chi el vol ben sie passi avanti;
E l'acqua, e l'aria, e quel beato sito,
Par che risponda: «sior macaco zito. »
11Uniti a congiurar contro el bon senso
In rimote campagne altri vedè,
Dandoghe ai so secreti un peso imenso,
Secreti che saver presto podè,
E a sti dialoghi l'eco e la campagna
Dise a chi più ragiona «Oh! che lasagna».
12Contro l'amor platonico laora
Intento el peruchier via de paron;
E tanto el pol quanto più scura è l'ora,
E i platonici, messi in convulsion,
Drio ghe core, e trovando un vago viso,
Platon ga in bota poro gramo un sfriso.
13Se 'l monotono son d'agreste legno
Chiama nei prai le piegore sbandae,
Se ai pigri tori el fa cambiar contegno,
Che deventa più alegri, e svelti assae;
Se scherza el beco, e salta la vedela,
Credo sta scena interessante e bela;
14Ma no per questo convegnir mi devo
Co chi le glorie de la vila spande,
Che analogia de gusti, e de solievo,
No gabiemo anca nu qua da ste bande,
Anzi rispondarò che ancora in questo
Semo copiai come za in tuto el resto.
15Foriera del riposo apena l'ombra
Cala apianin dai teti citadini,
Che vasta piazza in t'un mumento ingombra
Se vede da galanti, e da zerbini,
Che aletai da un sonar ben regolà
Spenze per arivarghe, e i ghe xe là.
16Fin che d'Euterpe dedicadi al culto
Spande el fià da per tuto i so seguaci,
Mercurio no ghe bada, e fa l'insulto
De mandar dei so puti i più capaci,
E mentre Enterpe ve desmissia afeti
Roba sti spiritosi i fazzoleti.
17Venere sempre mata, e capriciosa,
Ne le sudite soe svegia el morbin,
Nè distinguendo vedova da sposa,
Tenta meterle tute a quel confin,
E se la trova qualche renitenza,
Pur de spontarla adio siora prudenza.
18Amor, so fio, che ghe xe sempre a lai,
Tira colpi da mato ogni mumento,
Interesse, e capricio, accompagnai,
Fa doni a larga man d'un certo unguento
Che da quei svelti chimici è chiamà,
«Secreto per mostrar cordialità.»
19E se vedessi che bocon de fraca
Per poder otegnir la scatoleta!...
Nè xe la vista d'acquistarla a maca,
Che 'l genio più scozzona, e più dileta,
Ma più che 'l costo, i calcola l'efeto
De sto veneratissimo secreto.
20Ghen pretende a ogni pato in dopia dose
Chi ga pension per dirse inamorae,
Lo vol diverse sfortunade spose
Co dei vechi marii sacrificae,
Ghen vol la dama, o 'l cavalier servente,
Che finge un gusto de trovarse arente.
21Strepita per averlo el licardin,
Che co le vechie fa da inamorà,
Che mentisce un amor tanto più fin,
Quanto ogni dì de più l'è compensà...
Curte xe tanti, e tanti i concorenti,
Che 'l va via tuto in picoli mumenti.
22Anca la compassìon vestia da vechia,
Mal ferma in pie s'interna tra la fola,
E blocando qualch'una, in t'una rechia
Insinuante spende una parola,
E ghe dise mostrando un tal da drio,
«Movite a carità, varda quel fio!»
23A cavalo d'un zefiro lisìer
Favor svolazza da sta parte in quela,
Invidia lo persegue a più poter,
E gelosia tastandose in scarsela,
Ustinada d'aver visto el sicuro,
Trova tuto puntivo, e tuto duro.
24A tanti colpi de diverso peso
Le ferie se spalanca in t'un istante,
E se 'l cuor per fortuna el resta ileso,
Almanco la rason xe vacilante;
Vulcan intanto se conforta lu,
Disendo, nela scuola eco un de più.
25Qua gh'è teatri, e in vila no ghe n'è
Qua continui foresti, e là nissun,
Da novo gnente mai no sentirè.
E un politico là resta a desun,
Qua almanco grazie a Dio matina e sera,
O se teme, o se crede, opur se spera.
26L'oro e l'arzento per le strade trato,
Se gh'augura el bon viazzo incassetà;
E no avendolo almanco ne xe grato
De saver quanto l'è, dove che 'l va,
E tuti gode dir podendo, oh dio
Tra quel'oro ghe n'entra anca del mio!
27Insoma cossa strazio el tempo adesso
In tanti, e tanti inutili confronti!
A strussiarme cussì no xe l'istesso,
Che vaga a provocar chi sarà pronti
A favorir de l'aseno in risposta,
Monea cuniada per ste cosse aposta!
28No no, chi vol se la diverta fora,
Tra Satiri e Napee fin che ghe piase,
E de la vila soa che i la discora,
Come megio i la vol, che i lasso in pase,
Za mi ho deciso, e da de qua no sorto,
Se non quando ingrassar dovarò l'orto.