La Fedeltà
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← La Tentazion | Edission e fonte ▼ | El Sonador de mandolin → |
.jpg)
— Ah! cagna, sassina,
Busiera, fintona
Indegna de dona,
Alfin t'ò squagià!
No vôi sentir scuse,
No ti me infenochi,
Ga visto i mii ochi
La to infedeltà.
Tradir chi te adora!...
No te la perdono!
Va là, te abandono,
Ripudio 'l to amor. —
Cussì a la so Nana,
Trovada in fragrante,
Diseva un amante
Orbà dal furor.
— Vien quà, Toni mio,
No xe vero gnente
Mi son inocente
Te amo, vien qua. ―
— Amarme?.. inocente?
Go un bel atestato!...
Rispondi: sul fato
No t'ogio trovà? –
—Sul fato, ti disi?
Ah! dunque ti credi
A quel che ti vedi
Piutosto che a mi?
Ah! più no ti me ami,
Lo vedo dai fati:
Sti omeni ingrati
Xe tuti cussì;
I cerca un pretesto,
E po i se la cava!
El cuor me la dava:
Sì, go una rival.
Me nego, me mazzo
Se ti me abandoni...
Desmolime,.. Toni...
O Dio! me vien mal. —
Qua Nana pianzendo
Se morsega i dei,
Se strazza i cavei,
La va in convulsion:
E Toni colpio
Da tuto sto impianto,
Se calma a quel pianto
E resta... un minchion.
― Go visto, el diseva,
L'è cossa de fato:
E pur el so stato
No falo pietà?
Ah! sento che ancora
Vôi ben a culia!..
Se la gelosia
M'avesse inganà?
Chi sa? l'aparenza
No merita fede:
Scaldai se travede,
E uno par do.
E po la mia Nana
No xela qua spanta
Per mi tuta quanta?
Nè ghe credarò?
Ah! sì, me ribelo
Piutosto ai mii ochi:
So qua ai to zenochi,
Perdon, go falà. –
La lassa ch'el prega
Un bon quarto d'ora,
E sta traditora
Ga alfin perdonà.
Xe fata la pase,
I torna morosi...
Momenti preziosi!..
El resto se sa.
Le done xe furbe,
E nu semo sciochi:
I torti patochi
Ne par fedeltà.
.jpg)