La Tentazion
|
Edission original: |
Giuseppe Coletti, Poesie postume in vernacolo veneziano, Venezia, Gattinoni, 1889 |
|
Fonte: |
Indice:Coletti - Poesie postume in vernacolo veneziano, Venezia, Gattinoni, 1889.pdf |
| ← Marinela | Edission e fonte ▼ | La Fedeltà → |
.jpg)
Εl gran Tonante
Spesso galante
Vardando in tera
Da l'alta sfera,
Se qualche cocola
Ga ponto el cuor,
Calava in maschera
A far l'amor.
E cambià in toro,
In piova d'oro,
Toleva in gropa
La bionda Europa,
L'à roto a Danae
La so preson...
E po altre busare
D'ogni rason.
Cussì una sera
De primavera,
Mi da un palcheto
A San Beneto
Un sen belissimo
Avendo ochià
Sul palco scenico
M'ò ingaluzà.
Peto tornio,
Colmo, spartio,
Pan de butiro,
Che ga respiro,
Delicatissimo
Come un piumin...
No, l'è più candido,
Più molesin.
No gh'è modelo
De un sen più belo;
Cede a la prova
Fidia e Canova:
L'è raro, unico,
El pol sfidar
El sen de Venere
Sortia dal mar.
Move le suste
Fin le più fruste,
A chi lo toca
Vien l'acqua in boca
Quel peto magico,
E su ghe mor
Le ociae più tenere
Che gabia Amor.
Se quela sera
Giove mi gera,
Cambià in un'ava,
Quando la cava
Dai fiori el zucaro,
L'istesso ben
Svolava a goderme
Su quel bel sen.
Coi sensi invasi
Stava là, quasi
Per trarme fora.
Go pensà sora,
E fati i calcoli
Me son fermà...
Vogio far tombola,
Ma sul sofà.
.jpg)