La Fenice (1817)
|
Edission original: |
Collezione delle migliori opere scritte in dialetto veneziano, Volume sesto: Apologhi di Francesco Gritti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 6.djvu |
| Edission e fonte ▼ |
Chi dise per vogia,
Cussì, de viazar;
Chi dise per boria
Per farse amirar.
5La bela Fenice
L'Arabia felice
Scorendo in tre dì,
De bel mezzodì,
S'à un zorno trovà...
10Sau dove-mo?... a Stra.
Baucando per aria,
Soleta, a pian pian,
L'andava su a Padoa:
Savè che a sta man,
15Pisani-Moreta
Ga un bosco. Stracheta,
La dise: Sior si,
Fermiamoci qui!
E un carpano ochià
20La se gh'à sentà.
La Fama, petègola
Per genio e mestier,
L'à fato ai volatili
In bota saver.
25Cigando in francese
La scote 'l paese:
Oiseaux mes amis,
La reine et ici!
La lengua i la sa;
30S'à tuti afolà.
El ramo d'un albero
Se fita un zechin;
L'impresa de l'arzere
L'à tolta Manfrin;
35I oseli se schiera
A miera e miera
Co i coli, cussì!
Che i par tanti I,
Col beco impirà,
40Co l'ochio incantà.
Vardandola, atonito,
Diseva 'l Paon:
Va al diavolo, invidia,
Cedemo, Giunon!
45Quei ochi? xe stele!
Le pene? candele!
Che Sol? no, per dì...
Quel beco fa 'l dì!
Quel zufo dorà
50L'à Giove spuà!
— Fenice, de l'Iride
Sorela magior,
Dì, quel che te sfiamega
Xe 'l fogo, o color?
55Aplaude, fa eco
Co tanto de beco,
Col falelolì,
Col ciricicì,
Oseli de qua,
60Oseli de là;
Ma quando po in musica
Soave, gentil,
La modula un: Grazie!
La par un avril!
65El Rossignol stesso
Ah! (dise) 'l confesso,
Son vinto! Sentì
Che trilo in bemì!
Che bel elafà!
70Son proprio copà!
— Belezza adorabile,
Celeste virtù,
Va là che ti meriti
De no morir più!
75I osei ciga in fola,
Co tanto de gola:
Che morte? mentì...
La torna pipì
Sul rogo impizzà;
80Le celeghe 'l sa!
Ma in mezzo a sto aplauso
Che xe general,
Sospira la tortora,
Ingenua, leal.
85Se acorze, e smanioso
Ghe dise 'l so sposo:
Ti susti, Bibì?
La invidistu, dì?
Perchè stastu là
90Col beco cascà?
Risponde al rimprovero
La tortora: Oibò!
Pensava che... (Viscere...
Invidia? mi no)
95Che de la so razza
L'è sola, gramazza!
Che almanco po mi
Son sempre co ti!...
No minga per... Ma...
100No fala pecà?
Quel merito in isola
Che spesso invidiè,
Ve cava le lagreme,
Se lo esaminè.
105Tra i beni gh'è queli
Ch'è megio, fradei,
Averli a demì.
No so se capì
El gusto che ga
110Chi gode a mità!