La Fenice
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Chi dise per vogia,
Cussì, de viazar;
Chi dise per boria
De farse amirar.
5La bela Fenice
L'Arabia felice
Scorendo in tre dì,
De bel mezzodì,
S'à un zorno trovà...
10Sau dove-mo?... a Strà.
Baucando per aria,
Soleta, a pian pian,
L'andava su a Padoa.
Savè, che a sta man,
15Pisani-Moreta
Ga un bosco. Stracheta,
La dise: Sior si,
Fermiamoci qui!
E un carpano ochià
20La se ga sentà.
La fama, petegola
Per genio e mistier,
L'à fato ai volatili
In bota saver.
25Cigàndo in francese
La scote 'l paese:
«Ossò mes amì
La ren et issi!»
La lengua i la sa;
30S'à tuti afolà.
El ramo d'un alboro
Se afita un zechin;
L'impresa de l'arzere
L'à tolta Manfrin;
35I oseli se schiera
A miera coi miera
Co i coli cussì,
Che i par tanti I,
Col beco impirà,
40Co l'ochio incantà.
Vardandola atonito
Diseva 'l paon:
«Va al diavolo, invidia,
Cedemo, Giunon!
45Quei ochi? xe stele!
Le pene? candele!
Che sol? no, per di...
Quel beco fa 'l dì...
Quel zufo indorà
50L'à Giove spuà!
— Fenice, de l'iride
Sorela magior,
Dì, quel che te sfiamega
Xe 'l fogo, o color?»
55Aplaude, fa eco
Co tanto de beco,
Col falelolì,
Col ciricicì,
Oseli de qua,
60Oseli de là;
Ma quando po in musica
Soave, gentil,
La modula un: grazie
La par un april!
65El russignol stesso
«Ah! (dise) 'l confesso,
Son vinto! sentì
Che trilo in bomì!
Che bel elafà
70Son proprio copà!
— Belezza adorabile,
Celeste virtù,
Va là che ti meriti
De no morir più!»
75I osei ciga in fola,
Co tanto de gola:
«Che morte? mentì...
La torna pipì
Sul rogo impizzà,
80Le celeghe 'l sa!»
Ma in mezzo a sto aplauso
Che xe general,
Sospira la tortora,
Ingenua, leal.
85Se acorze, e smanioso
Ghe dise 'l so sposo:
«Ti susti, bibì?
La invidistu, dì?
Perchè stastu là
90Col beco cascà?»
Risponde al rimprovero
La tortora: «oibò!
Pensava che... (viscere...
Invidia? mi no)
95Che de la so razza
L'è sola, gramazza!
Che almanco po mi
So sempre co ti!...
No minga per... ma...
100No fala pecà?»
Quel merito in isola
Che spesso invidiè,
Ve cava le lagreme,
Se lo esaminè.
105Tra i beni gh'è quei
Ch'è megio, fradei,
Averli a demì.
No so se capì
El gusto che ga
110Chi gode a metà.