La Mosca (1817)
|
Edission original: |
Collezione delle migliori opere scritte in dialetto veneziano, Volume secondo: Poesie di Antonio Lamberti, a cura de Bartolommeo Gamba, Venezia, al negozio di libri all'Apollo, dalla Tipografia di Alvisopoli, 1817 |
|
Fonte: |
Indice:Collezione delle migliori opere scritte in dialetto veneziano 2.djvu |
| Edission e fonte ▼ |
In quei bei tempi d'oro,
Che parlava el molton, la manza, el toro,
Le mosche, i rospi, i sorzi, i aseneli
E che tuti parevimo fradeli,
5Che nasseva i puteli
Senza che la Comare o 'l Comaron
Facesse de le brute operazion,
E che tuto gera bon;
Che dai roveri el miel,
10Dai fiumi se gavea late e puina,
Che no gh'era cusina,
Nè leti, nè poltrone,
E che le done gera Nine e None,
Val a dir brave e bone,
15Servindo d'una gran comodità
A tuta quanta la Comunità
Senza driti esclusivi;
Che sicuri dormivi
Che no ghe gera lite e terza e nona,
20Nè dei Grandi la razza sfondradona,
(Tempi che se i gh'è stai,
No i tornerà più mai
Per i nostri pecai)
Giusto in sti tempi digo, gh'è stà un omo,
25Che stufo de campar da galantomo
Una dona l'aveva inzinganà,
E 'l s'avea messo in testa
De formar quel che i chiama Società.
Co lu l'avea chiamà
30Un bravo Gato e un Can,
Za persuasi de sto novo pian.
I è andai in t'una valeta
Da la madre Natura predileta,
E in quela i à destinà
35De piantar sta so nova Società.
L'omo cussì à parlà:
Animali fradeli,
Se ò da considerarve come fioli
De quela che chiamemo la Natura,
40Che à stampà ogni creatura,
De mi inferiori assae,
Per altro co' se vol considerar,
Che in do pie no podendo caminar,
No gavarè mai man,
45Come el genere uman;
Quando se pensi a la mia gran malizia,
Che da qua avanti chiamerò giustizia,
Filosofia, Rason,
E che un zorno à da farme parer bon;
50Animali, diseva,
Vu vedarè che no s'avemo unito
Per scampar da la sè, o da l'apetito,
A bastanza ne da
Quela che n'à creà,
55Ma i gusti è pochi e scarsi,
E v'ò fato capir,
Che stando uniti insieme
Li podemo ingrandir,
Perfezionar, condir;
60Insoma gh'è una gran diversità
Da l'animal salvadego, a quel de società.
Sto principio impiantà,
Qualcossa s'à da far,
Vu za el vedè, un per l'altro
65Per poder ben campar.
Mi in la bona stagion
Farò la provision
E de grani e de fruti,
Perchè co vien l'inverno
70No abiemo da zunar in sempiterno.
Sta dona che vedè,
Che da qua avanti chiamarò Mugier,
Val a dir che nissun la pol più aver,
La penserà a sugarli,
75A netarli, a secarli,
E po co tuta la so arte
La ne farà la parte;
Invece de spelonca
Con de la pagia, co dei rami sechi,
80Co del fango, dei stechi
Farò una certa fabrica,
Che chiamaremo Casa,
Dove ch'el fredo, el vento
No possa vegnir drento;
85Farò cent'altre cosse in conclusion
Perchè el viver sia bon.
Mi farò questo, e vu
Cossa fareu, da bravi,
Rispondè; disè su? —
90Mi, dise el Can, dai ladri,
Che ancuo s'à da chiamar
Quei che qua se volesse desfamar,
Ve saverò vardar,
Zigherò, sbragiarò,
95E se ocoresse, li morsegarò. —
— Ben bravo, dise l'Omo,
L'è un far da galantomo,
E vu: voltà dal Gato; —
— Mi per tante bravure no son fato;
100Ma savè che gh'è i Sorzi,
Che da per tuto i va,
E i vegnirà anca qua,
E che per profession
Me piase el bon bocon;
105Mi li mazzarò tuti, e con bravura
Ghe darò in tel mio corpo sepoltura.
Intanto che i parlava
I vede là una Mosca, che atenta li ascoltava.
— Sior animal chi seu?
110Ghe dise alora l'Omo,
E con nu: cossa feu? —
— Mi son la Mosca, e come in vita mia
M'à sempre piasso star in compagnia,
Cussì, cari, sentindo
115Tante cosse a contar
Del novo vostro star,
Voleva in sto momento
Co vu unirme a campar. —
— La Mosca donca sè,
120E star co nu volè?
Ben siora, rispondeme,
Qual è el mistier che fè? —
Con un aria da petegola
La sbalza su una fregola,
125Po a la testa del Can,
E alfin sul naso uman,
Lu intanto chiacolando,
Sempre la stuzzegava,
E l'Omo stranuava.
130Ela in bota scampava,
E dopo la tornava,
E l'Omo s'inquietava:
135Via quieteve in malora
El dise, respondè,
Qual è el mestier che fè? —
— Co volè che ve diga
No son tropo paziente;
140Mi no ò fato mai gnente;
Stago coi animali
Uguali, disuguali;
Se gh'è qualche bocon
Che anca per mi sia bon,
145Mi te ghe sbalzo in cima,
E voi esser la prima;
Volerme cazzar via,
S'à capio che l'è un pezzo,
Che la xe una pazzia;
150E chi me vol mazzar
Ghe perde più in tel tempo
Che bisogna fruar.
No gh'è animal per questo
Che me fassa paura
155Nè per le sgrinfe o el dente,
Nè per la so' statura,
In soma mi no ò fato,
E no farò mai gnente: —
— L'è un parlar da insolente,
160Salta su el Can, nè so chi che me tegna... —
— Sior Can la se trategna,
L'omo interompe, co la furia mai
No à da esser tratai
Tra nu altri i afari, e qua stà el ponto,
165Che s'à da far quel che più torna a conto.
Lassè che parla mi:
Siora Mosca, sentì,
Ghe dise alora l'Omo,
Mi de rason podaria farve un tomo,
170Ma inutili al muomento,
Voi che ve persuada el sentimento.
Capisso che la massima
Per vu xe bela e bona,
Se vede che se' nata zentildona;
175Ma se de star co nu ve degnarè
Cara, son persuaso
Che qual cossa farè. —
— Gavè una bona grazia,
Dise la Mosca alora,
180Che molto me convince e m'inamora;
Quelo che posso far
Ze de lassarve star,
Co me dè da magnar.
Da rabia el Can sbragiava,
185E anca el Gato sgnaolava,
Ma l'Omo più prudente,
Che se ramemorava
Quanto la Mosca al naso lo inquietava,
El li tira in disparte,
190E co tuta quel'arte,
Che xe fia de l'umana costruzion
El fa ch'el Can, el Gato
Intenda la rason.
Con un primo Decreto,
195Che xe stà el più perfeto,
S'à dovudo fissar
De darghe da magnar
A so Celenza Mosca
Perchè la i lassa star.
200Qualcun dimanderà
Se in sta fiaba ghe xe moralità,
E mi risponderò:
Co nol savè vu altri
Gnanca mi no lo sò.