La Nina
|
Edission original: |
Jacopo Vincenzo Foscarini, Per le nozze Medin-Maniago, Versi in dialetto veneziano, Venezia, dalla tipografia di G.B. Merlo, 1839 |
|
Fonte: |
| ← La Nana | Edission e fonte ▼ | El cambiamento d'idea → |
LA NINA
Ghe xe tante belezze
Che no fa gran efeto
Perchè le ga pocheto
Spirito, brio, sestin.
E ghe ne xe de quele
Che piase solamente
In mezzo a la gran zente
Come saria a un festin;
Ghe n'è che piase in casa
Vestie senza pretesa;
Ghe n'è che piase in Chiesa
Che pìase sul sofà;
Ma ti, Nineta bela,
Piena de tanto fogo
Ti piasi in ogni logo
Dove ti sta, o ti va.