La Pruçission del Cristo (a Cannaregio)
|
Edission original: |
Adolfo Gerani, Poesie veneziane, Venezia, C. Ferrari, 1903 |
|
Fonte: |
Indice:Gerani - Poesie veneziane, Venezia, Ferrari, 1903.pdf |
| ← Un insogno vero | Edission e fonte ▼ | La Tombola in famegia → |
In-te-la Cesa de San Geremia
Ghe xe, viçin l'altar magior, un Cristo;
No ste creder che diga 'na busia
Che i veneziani tuti lo gà visto,
Co la so brava barba e i cavei longhi
Che ogni tanti ani i cresse come i fonghi.
Ghe xe chi dise che i sia propio veri;
Ma za crede a le ciacole dei tondi!
E come xela che i xe tuti neri
Se Gesù Cristo li gaveva biondi?
El fato sta che no se pol trovar
Barbier che possa fàrgheli, o scurtar.
Intanto el nostro popolin del tardi
Crede co gran delizia del piovan,
Che 'l se la ride, e 'l tira i so lombardi,
E 'l se n'infis'cia del rispeto uman,
E de la lege che, carga de mufa,
Senza voler protege sta gran trufa.
Za come el sol la xe 'na roba vecia
Che tuti tira l'aqua al so mulin;
I preti e i siori i magna in-t'una tecia,
E 'l pesse grosso magna el pichenin:
Tuti se rangia ancùo, tangaro chi
Se fa imbrogiar de note e anca de dì.
Se dovesse i miracoli contarve
Che fa sto Cristo, me vorìa un messal;
Ma, avendo gran paura de stufarve
Co robe che no gà pèvare e sal,
Xe megio che ve diga su a memoria
La dolorosa e comovente storia.
Ma, per contarve ben anca in suçinto
La pruçission del Cristo e la gran festa,
Me vorave del povaro Giaçinto
Che dorme a San Micel, aver la testa;
Alora sì che la farìa da vasco:
Basta, me provaró; ma farò fiasco...
Dopo disnar, quando de roba piene
In panza a tuti le buele tase,
Vestii per ben, co tanto de caene,
Vien fora i çitadini da le case,
E i coverze le Cale in 'na maniera
Che no se vede più piera su piera.
No se vede cussì in-t'un formigher
Tante formighe andar de quà e de là;
Come zira su e zo per sto Sestier
Tuta ta zente de la gran Çità;
E de lengue, e de pie un bacan se sente
Che fa tremar in fin le Fondamente.
Co le campane, quei da l'aqua i ziga:
― «Fresca l'aqua e limon, la spaca i goti!»
― «Quel da le semeee!» - «Vôrla mi, la diga?»
Ei putei che insordisse coi subioti!
Ve digo mi che quela xe 'na festa
Che ve rompe coi timpani la testa...
Ma ed ècote che tuto in-t'un momento
De la Cesa le porte se spalanca:
Davanti vien el Santo Sacramento
Tra i zighi: «Tre naranze 'na palanca!»
― «O che bei fighi!» ― «Caragoi!» ― «Crocanti!»
E 'l prete intona l'itanie dei Santi.
Xe batistrada el nònzolo, che in zergo
Ziga ai putei: «Ma andè in malora vostra!»
La Banda intanto intona el Tantumergo,
E 'l Croçefisso sul porton se mostra:
La brava zente piega i so zenoci,
E i liberai spalanca tanto de oci.
Dal Campo zo per la Lista de Spagna
Pian pian se invìa la longa pruçission;
Eco i preti, e 'l piovan in capa magna;
Eco la xe arivada a la Stazion,
Indove co rispeto mai più visto
Tuti saluda l'arivar del Cristo.
Le brute vecie, carghe de rimorsi,
Le se bate el bonigolo; e i becheri
Che sùa sangue per portar i tôrsi,
Vestii de bianco come Toni seri
I pensa, (povarini i xe cristiani),
A la desfida de Barleta... e Trani.
— «Ciò, ma i se slonga quei cavei... i li sèmena.»
(Dise un barbier a un marangon). — «Si, vedo!
(Risponde lu), che i sia de qualche femena?»
— «Credistu ti?» ― «Mi, come mi, no credo...»
— «Povaro lu, se andemo de sto passo,
Fra poco tempo, el li gà longhi un brasso!... »
— Senti, cio Toni, che ghe sia sti Cristi
Ste madone e sti Santi de l'altar,
Mi, a dir la verità, no li gò visti
E no ghe credo 'n'ostia, no te par?»
— «Ti ga rason, ma che ghe sia un supremo,
Compare mio, bisogna che credemo.
Gastu mai visto ti quando che scuro
Se fa el çielo, lampiza e s'ciopa el ton?»
― «Ben?» - «El xe lu, che batendo sul tamburo
De le nuvole, el dise: Oheee, se ghe son!»
— «Ma le xe tute cabole inventae!...»
― «E 'l ton?» - «Le xe nuvole inrabiae!»
— «Inrabiae, ma per cossa?» ― «Co San Piero
In çielo el va tor su la roba sporca,
Coi so cavei e un careton de fero
El fa un bacan del dia...» ― «Va su la forca!»
― «Ciò, questo el xe el Vanzelo de San Luca...»
— «Ma tasi, andemo. (Et inenos induca)!...
Ben senti, ciò: lassèmo star l'Inferno,
El Paradiso, e po anca el Purgatorio;
Ma negar che ghe sia un Dente Sulperno
La xe da bestie: no te par, Vitorio?»
— «E ciò, securo; senza el perno sora,
El trapano no va...» ― «Ma va in malora!
Ti, ti gà vogia de scherzar; ma mị,
Rispeto, e credo in quel paron dessù...»
― «Se tuti la pensasse come ti,
El mondo l'andaria col culo in su!...»
― «Ma che, ma cossa mai: la religion,
Porco d..! la ghe vol...» ― «Ti ga rason!»
Cussì tra chi che crede, e chi no crede,
Sti dialoghi se sente incalorai;
(Giuro, se in-t'i poeti gavè fede,
Che dal vero li gò stenografai)...
Come questo, che a svolo gò ciapà
Tra do preti compunti de pietà:
— «Don Piero, el varda lu che 'l se n'intende...»
― «Indove ciò?» - «Dessù!... xela belina?»
— «(Deus in adjutorium meum intende).»
— «(Domine ad adiuvandum me festina).»
― «Cara da Dio!...» - «La par 'na Bersabea!
― «(Et non est sanitas in carne mea...)»
Eco la pruçission che da Baschiera
La se dirige al Ponte de San Giobe,
Dove el Cristo se ferma, e 'l toca tera
Per saludar el Gheto e sior Giacobe...
Po, avanti ancora, e sempre a pian la va
De San Leonardo via per el Terrà.
El Ponte de le Guglie xe infornio
De damaschi, de fiori e de bandiere
Che sventola per aria sora el Rio;
E bianche, e rosse; ma più zale e nere,
Perchè ghe piase al popolo cristian
El brodo de le sepe, e 'l zafaran...
Ghe xe tra 'n prete e l'altro un questurin
Che tien d'ocio la pisside, e il Signor;
I siori gà la man-t'el tacuin,
Perchè no se sa mai, co quel rumor,
Co quel caldo, e in sti tempi busarai,
Fa miracoli fin i desparai...
El Cristo sgrendenà za torna indrìo
Tuto contento a la so santa sede.
Ma, e se 'l ghe fusse, digo mi, sto Dio
Che tuto pol e tuto el sente e 'l vede,
Perchè vedendo çerte arlechinae
Nol manda zo un diluvio de stangae?
Ma come i salmi va finir in gloria,
La festa va a finir in-t'el magnar:
In bali, canti, soni e in 'na baldoria
Più difiçile a dir che a imaginar;
La Cesa lassa el posto a l'Ostaria,
Ma tuto no finisse in alegria.
Sul tardi po, che xe la gara dele
Rachete, i foghi che diverte tanto,
Coi: ohooo! coi: ahaaa! che va fin a le stele,
Intanto che za imbriaghi de vin santo
Da don Gagio la banda de Coleti
Co le mazulcre fa saltar i preti.
E a note, quando se destùa i lumini,
E la zente per ben la va a dormir,
Scominçia le barufe dei fachini
Carghi de vin; po tuto va a finir
In ostreghete, bali, punc, sfogiae,
Basi de fogo... pugni e cortelae.