La bogonela

by Berto Barbarani

3 La bogonela I due canzonieri I due canzonieri/Libro I - El rosario del cor L'invito Le rabiète Berto Barbarani 1895 XIX Soneti veronese

Indice:Berto Barbarani, I due canzonieri, 1917.pdf

Berto Barbarani ―  I due canzonieri  ― Libro I - El rosario del cor

La bogonela

1895

Edission original:	Berto Barbarani, I due canzonieri, Verona, P. Apollonio, 1917
Fonte:	Indice:Berto Barbarani, I due canzonieri, 1917.pdf

←  L'invito

Edission e fonte ▼

Le rabiète  →

LA BOGONELA.

     La bogonela¹ l'è una roba giala,
tuta piena de pocio² molesin,
che vista da lontan, la par 'na bala,
che cora in pressia:³ ma la va a pianin...

     La ghe mete du giorni a far 'na scala
e la fà quatro tape par scalin...
– Ohe! Siora bogonela, dove vala?
– Vado par acqua... S'à impissà⁴ el camin...

     La me morosa, invesse, oh Dio, la core
che l'è la ferovia de casa nostra;
se ghe disì de star sentà, la more...

     Ma se g'ò da contar la verità,
la bogonela, i corni la li mostra,
e me morosa invesse la li fà!

---

Note

1. bogonela: chiocciola
2. pocio: umore
3. in pressia: in fretta
4. s'à impissà: si è incendiato.