La busarada

by Attilio Turco

3 La busarada Sonetti Veronesi Sonetti Veronesi/Parte I - Gli autor...e...voli La paca Da rabiado Attilio Turco 1924 XX Soneti veronese

Indice:Attilio Turco - Sonetti Veronesi.djvu

Attilio Turco ―  Sonetti Veronesi  ― Parte I - Gli autor...e...voli

La busarada

1924

Edission original:	Attilio Turco, Sonetti Veronesi, Verona, Tipografia Operaia, 1924
Fonte:	Indice:Attilio Turco - Sonetti Veronesi.djvu

←  La paca

Edission e fonte ▼

Da rabiado  →

LA BUSARADA¹

I.

Quando sento s-ciocar² de le pianele
     Sul marciapiè davanti a la me casa,
     Me dà su ’n te ’l sarvel le scalmanele³
     E me se impissa el cor come ’na brasa!⁴

E coro a la finestra e le putele,
     Che no’ ve digo quanto le me piasa,
     Le me passa davanti alegre e bele
     E... vorea dirghe, ma bison’ che tasa...

Bison’ che lasa... Ormai par serte cose
     Al me’ oroloio l’ora l'è sonada...
     Ve saludo putele, adio morose,

Andè cantando per la vostra strada!
     Se, ai me’ tempi, n’ò fato la me’ dose,⁵
     Sento d’aver ciapa... 'na busarada!

II.

Quando fasea amor co ’na putela,
     Parlemo almanco de trent'ani fa,
     Ghe disea: te si bona! te si bela!
     — Te si brava!... te si... ’na rarità! —

Ghe refilava⁶ qualche caramela,
     De quele co la menta o col mistrà;
     Alora ghe n’avea sempre in scarsela,
     Parchè se le comprava a bon marcà...

E me recordo, tute ste putele,
     (Ghe n’ò squassado⁷ tante che no so)
     Le se godea ciuciar⁸ le caramele,

Ma par i basi le disea de no...
     Quela che m’à basà, me l'ò sposada...
     Oh Dio! quel baso, fioi, che busarada!

---

Note

1. busarada - buggerata;
2. s-ciocar - battere;
3. le scalmanele - i bollori;
4. brasa - bragia;
5. la me dose - la mia parte.
6. refilava - porgeva, regalava;
7. squassado - innamorate;
8. ciuciar - assaporare;