La deçima Musa
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Futura legenda | Edission e fonte ▼ | Cossa m'importa a mi?... → |
Più te vardo e più te amiro
Quei do oci de zafiro;
Quel viseto
Palideto,
Quela cioca
Berechina,
Quela boca
Piçenina,
Coralina...,
Quel naseto...
E 'l ben de Dio
De quel peto
Ben fornìo...
E quel colo alabastrin;
Quela man e quel penin
Curtesin,
Galantin..,
Più me scaldo el coresin,
Più me esalto col pensier
E... voria,
Voria poder,
Come pol la fantasia,
Tor su tuto e... portar via!
Po, svolando,
Delirando
Co la puta
Che ga tuta
Sta robeta
Benedeta,
Trasportarme sul Parnaso
E lassù s'ciocarghe un baso;
Carezzarghe el peto, el colo
Presentandola al dio Apolo
Che, vedendo quel zogielo,
Nato,
Fato
Per el cielo;
Che, vedendo quel splendor,
Lo darìa
Per compagnia
A quel'altre so Sorele
Tute brave, tute bele!
Po, co un ato assae cortese,
El dirìa: ― Nove e una diese!... ―
Preparandoghe un Tempieto
Propriamente dirimpeto
Del so Trono, per vardarla,
Amirarla,
Contemplarla,
E per farghe, insoma, onor
A chi degna xe de Amor!