Futura legenda
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Fumando | Edission e fonte ▼ | La deçima Musa → |
Erede fortunà del più bel Trono
Che vèder mai se possa su la tera,
Piantà dal Galantomo de so Nono
Che ga onorà el Paese in pase e in guera,
E che a un secondo Marte el paragono,
Un Principe Real un dì ghe gera,
Unico Fio, ma degno del Gran Pare
E de quel Fior soave de so Mare!
Sto Principe se svegia una matina
Che gera apena l'alba e, in gran premura,
Vestindose a la megio, el se incamina
Senza tor su cavalo, nè vetura;
E, co 'l xe stà su in çima a una colina
Che fava da scabelo a quel'altura
Che sèpara l'Italia da la Franza
Perchè le staga.... a debita distanza,
Ardito, svelto e tuto alegro in viso,
Sul qual se ghe lezeva del coragio;
Pensandoghe un tantin, ma no indeciso,
El s'à fermà per scieglierse un passagio;
E quando el l'à trovà, con un soriso,
El se ga messo a far quel fià de viagio
Che terminar doveva, gnentemanco,
Sul culmine giazzà del Monte Bianco!
Ma cossa ghe xe mai vegnudo in mente
D'andarse a cazzar là come un osèlo....
In dove che 'l Signor perpetuamente
El ga deposità la neve, el gelo?...
In dove che se pol comodamente
Vardar se ghe xe anzoli nel cielo?...
Che 'l s'abia mai sognà, co 'l gera in leto,
De vèderse davanti un anzoleto?...
El se lo ga insognà..., ma no 'l l'à visto;
El ga sentìo la vose.... e ga bastà;
E Lu, che za pensava a un çerto acquisto,
El ga subito in bota domandà
Se 'l fusse stà mandà da Gesù Cristo,
E come, e dove, e quando el podarà
Per so fortuna vèderlo in persona
Magari soto forma.... de una dona!
La voce de quel Anzolo invisibile
La ga risposto alora in bel soprano
Che tuto quanto in Çielo xe possibile;
Che no lo prega mai nessun invano;
Che senza mediazion de l'Infalibile,
Verso la fin de Otobre de quel ano,
El ghe darà la man a quela Dama
Che ga parlà al so cuor... e che Lu brama!
Ma che 'l se svegia subito e che 'l còra
In çima de la più alta montagna
Da dove el vedarà la Gran Signora
Che destinada xe per la compagna
De tuta la so vita!... Elo, alora,
Come l'andasse a goder la cucagna,
Xe corso a contemplar, felice e alegro,
Dal nostro Monte Bianco el Monte....negro!
Intanto el sol nassente za anunziava
Al Prinçipe, che stava fermo e atento,
Che la Regal Donzela gera alzada
E che lontan no gera el bel momento
Che tanto, e da un tocheto, el sospirava!
Ma un improviso rèfolo de vento
Ga portà via una nuvola in Levante
E, a l'ocio de quel Principe esultante,
S'à presentà, fra gigli e zensamini
Vestio de raso e d'oro del più belo,
E tuto pien de perle e de rubini,
L'anzolo del so cuor, calà dal cielo
Da le graziose man dei cherubini;
E, diadema sul più candido velo,
Una stela fiamante su la testa,
Simbolo del so cuor che gera in festa!
El Principe, davanti a quel portento
De grazia e de belezza..., el s'à inchinà;
El xe restà incantà per un momento
E, dopo, zo dal Monte el xe saltà!
Corendo per la strada come el vento
Pianure, boschi e mar Lu ga passà...
E fato quel acquisto tanto belo....
El se lo ga portà nel so Castelo!
. . . . . . . . . . . . . . . . . . . . . . . . . . .
E qua, fie benedete, me despiase
De dirve quel che proprio no voria;
Ma cossa voleu far? Via, deve pase....
Del Principe la storia xe finìa!..