Fumando
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← A una nuvoleta | Edission e fonte ▼ | Futura legenda → |
Dopo disnà son solito,
Bevudo el mio cafè,
De far el chilo e un pisolo
Butà sul canapè;
E, quando me dismissio,
Impizzo un bon avana...
De quei che i furbi tràfega
In barba…... a la Dogana!..
Mentre che mi, pacifico.
El sigaro consumo....
Osservo i bianchi nuvoli
De l'odoroso fumo..,
E fra de mi, pensandoghe,
Fazzo sta riflession:
― Cussì, pur tropo, o zoveni,
Svanisse le ilusion!
La bronza de sto sigaro
Che lenta va a la fin...,
Xe de la vita el simbolo
Che segna el so destin!
Xe de l'amor platonico
L'antitesi evidente...
(Quelo dei sensi, al solito,
El dura poco, o gnente!) ―
Ma fin che da filosofo
Continuo a ragionar....
El predileto sigaro
Xe là per terminar!
Spesso, vedè, me capita
Che ciapo una scotada...,
Devento alora un diavolo
E tiro un'O... salada!
Devo però convinçerme
Che xe lege fatal
Che a un ben, per quanto picolo,
Ghe sia viçin un mal!
Che xe a sto mondo efimero
De zoventù l'ardor....,
Che eternamente zòvene
Resta soltanto Amor!