A una nuvoleta
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Indovinelo... spiegà | Edission e fonte ▼ | Fumando → |
Discorer co le nuvole
La xe un'usanza bona,
Perchè no gh'è pericolo
Che dopo se questiona!
- Terenzio
Dove vastu, nuvoleta,
Cussì sola per il cielo
Co sto fresco ventesèlo
Che le fogie fa cascar?
Dime, dime, benedeta,
Dal color de late e rosa...,
Vagabonda, vaporosa,
Dove vastu a terminar?
Quanti monti e quanti mari;
Quanti fiumi e quante tere...,
Chi sa mai, per quele sfere
Ne l'andar ti passarà!...
Ti, viagiando tanto in alto,
No ti vedi, no ti senti
Le gran piaghe, i gran tormenti
De l'intiera umanità!
Sora tute le miserie
De sto mondo ti camini...,
Ti de i grandi e de i meschini
No ti curi le viltà!...
No xe longa la to vita..,
Ma in compenso la natura
Te dà l'aria fina e pura...,
Ben diversa de qua zo!...
Anca mi, lizier, liziero
Deventar cussì vorìa....
Chè lassuso vegnaria
Per seguir el to destin!
Ma, pur tropo, no podendo
Vegnir là... materialmente...,
Mi te vardo avidamente,
Te 'compagno col pensier!...
E, seguindote, mi vedo
De sto mondo un fià de tuto;
Mi contemplo el belo, el bruto...
Che impressiona e fa pensar!
Se sfantandote improvisa
Ti casçassi zo dal çielo...
Mi diria: ― Finir xe belo
In quel modo che xe là!... ―
Specialmente co se pensa
Che una forza strapotente....
Pol donarte novamente
Esistenza e libertà!
Dime, intanto, o nuvoleta
Dal color de late e rosa...,
Vagabonda, vaporosa...,
Dove vastu a terminar?...
Dove vastu, benedeta,
Cussì sola per el cielo,
Co sto fresco ventesèlo
Che le fogie fa cascar?...