Indovinelo... spiegà
|
Edission original: |
Giuseppe D'Alpaos, Svoladine e refoli, Venezia, Fratelli Visentini, 1897 |
|
Fonte: |
Indice:D'Alpaos - Svoladine e refoli, Venezia, Visentini, 1897.pdf |
| ← Ai letori | Edission e fonte ▼ | A una nuvoleta → |
Mi no viagio in velocipede,
Nè co treni o co veture;
Mi no vado gnanca a pedibus....,
E pur visito pianure.
Monti, vale e gran çità....
E 'traverso i grandi oceani
Senza moverme de qua!
Go un agente çelerissimo,
Una specie de comesso....,
Che per tuti xe invisibile,
Che xe megio de mi stesso
Quando el va lontan, lontan!...
E pur lu, co tanti meriti,
No 'l ga paga o bone-man!
El xe svelto più del fulmine..,
Più del fià lu xe liziero..
E, corendo come eletrico,
El te zira el mondo intiero
E po el torna qua da mi,
Rinovando, senza ostacoli,
Sti so viagi tuti i dì!
Co'l xe via, che 'l me telegrafa,
Che 'l me fa la descrizion
De i so ziri..., qua ne l'ànema,
El me lassa un'impression....
Che no posso definir...
Una smania, un desiderio
Tanto forti, da no dir!
Da le cosse più mirabili
De la tera, opur del cielo..
E vegnindo zo a le semplici....
El descrive tuto in belo
In un colpo o do de man;
E par squasi che 'l me stùzzega
Da svolar co lu lontan!
— Cossa xelo, insoma?!... Un spirito?... —
Qualchidun domandarà,
— Xelo un mago, o xelo el diambarne
Che l'inferno ga lassà?!...
Rifletèghe...., ma ve par
Che dir suso de ste bùzare
Se ghe ciama indovinar?...
Quel'agente fedelissimo,
Quela speçie de comesso...
Che per tuti xe invisibile,
Che xe megio de mi stesso..,
Se ve preme de saver,
Senza far altri preamboli,
Ve dirò che 'l xe.... el pensier!