La festa veneziana dei pugni/Canto III
|
XIX secolo
|
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Canto II | Edission e fonte ▼ |
Muse che in Pindo nel più ameno sito
Ve soministra Giove
Alogio gratuito
A tute nove
5In camare apartae
Da star comode assae.
Zente che sia proveta
Per servirve a bacheta
A tute l'ore
10In qualunque sia forma e co' ve ocore,
Generoso salario
Sul fondo de l'erario,
Aciò senza misura
E de note e de dì
15Ai bisogni suplì
De la natura,
E casa de campagna,
Che no gh'è la compagna
Nele contrae beate
20D'Elicona,
Dove benchè tosate
Tute da maridar
Fè quelo che pol far
Qualunque dona,
25Godendove l'istà
Per rinfrescarve
De andar spesso a bagnarve
In piena libertà
Nuando da sirene,
30E una o l'altra metendoghe el mistrà
Nele aque tranquile d'Ipocrene,
Che come una madera,
Come un'ambrosia vera,
I poeti valenti
35Se le beve da ingordi col mastelo
Per digerir i gastrici potenti,
Che ghe agrava spessissimo el cervelo,
E dopo infervorai,
Del Pegaso montai
40Sora la gropa,
I va de gran cariera,
A rischio che i se copa,
Sul monte dove i spera
Co la chitara al colo,
45
E la so scienza
De divertir Apolo,
E i lo indormenza.
Muse, lo torno a dir
Per farme ben capir,
50Ve racomando
Ancuo no me sechè,
Perchè quante che sè
Tute ve mando
Senza nissun riguardo
55A torvelo da nardo
Sul mumento,
Che per un argomento
Serio come ze questo,
Vualtre bardassone,
60Lo zuro, lo protesto,
No sè bone,
Anzi a parlar da amigo
Co le vostre romantiche mocae
Me saressi de intrigo
65Grando assae;
Ma invece in assistenza
A infonderme nel sen
La potente semenza
Del velen,
70E conservarme nela nova scena
Robusto l'estro e fervida la vena,
Che me vegna Megera,
E Tisifone e Aleto,
Aciò nela maniera
75A sto vasto sogeto
Confacente,
In t'un modo eloquente,
E con un quadro vero,
Mi possa al mondo intiero
80Far palese
Co del profito assae
De ste teste scaldae
Le ardite imprese;
Che me vegna davanti
85E fade e negromanti,
Orchi, foleti,
E spiriti maligni e maledeti,
Che sconti nele grote
Tuto el zorno
90Solamente la note
I zira atorno
Con pratiche barone
A insolentar le done;
Che vegna coi so corni Fe[illeggibile]
95Satana, Radamanto, Belzebù,
E tutiquanti i diavoli, i serpenti,
Che nel profondo abisso de l'inferno
Inasprisce i tormenti
De chi ze là in eterno
100Condanai,
In pena ai so pecai
A brustolarse el cesto,
E tutoquanto el resto;
Che i vegna, sì che i vegna,
105Che li aspeto,
Avendo gran bisogno che i me insegna
El barbaro dialeto
Del tenebroso regno
De Pluton,
110Che assistio dal mio inzegno,
Da le mie inclinazion,
Dal mio talento,
Lo imparo in t'un mumento,
E cantando cussì
115La festa de sto dì
Tanto imponente
Co un linguagio al gran tema conveniente,
Con un detaglio esato,
Con un stil novo afato,
120E de mi degno,
Senza mai scapuzzar
Podarò sodisfar
L'assunto impegno.
Ma el corno benemerito,
125Che stando a de le ingenue tradizion,
Più assae per el preterito
In diverse ocasion
Gera adotà,
Sona da disperà
130Per dar secondo l'uso
Al popolo distrato
L'aviso che va suso
St'altro ato.
Sul campo de la guera
135Sventola la bandiera
Nele forme fissa
Per sta funzion
Da legi sanzionae
Fra le fazion;
140La zente a boca averta
Torna a meterse a l'erta,
El mormorio se quieta,
E pronta la trombeta
Da el segno che ze l'ora
145De petufarse ancora.
Come 'l cavalo che no sta più in strope
De la scuria insolente al primo indizio,
E tol a precipizio
El do de cope;
150Come che core i cani, argante e moro,
Co' a la rechia del toro
I vien molai;
Come che coraria
l'orsa se a caso mai
155Se vedesse la prole a portar via;
Opur qualche afamà
Che osservasse in distanza
Un pranzo destinà
Per la so panza;
160O per dir megio come in più d'un sito
Core 'l fator co ze scadù l'afito,
Cussì corendo a gambe i Castelani,
Corendo come lievri i Nicoloti,
D'ogni timor lontani
165De vederse ridoti
In quei frangenti
Soto un forte aversario socombenti,
In manco d'un mumento,
Più rapidi del lampo,
170Più presti assae del vento
Tuti se trova in campo,
Tuti se trova al ponte
Co l'inimigo a fronte,
E là un'orchestra piena
175De pugni dai de schena
Sul fato se rinova,
Dando novela prova
De valor,
Animà da la rabia e dal furor,
180Requisiti che genera el conflito
Assae più interessante e più acanito.
Se vede Nasavento
Tacà da far spavento
Col fiero Martorelo,
185
Che ghe ne dà un flagelo;
Se vede Remenà,
Che co un pugno mola
In abreviatura
Manda Spelonca squasi in sepoltura;
190Pulese che in cordele
Ghe riduse la pele
A Tribolato,
Doparando le onge come 'l gato;
Brufolo che a Polame
195Ghe frantuma el corbame;
Petola che a Mastela
La testa ghe sfrasela;
Mantese che pien d'ira
Se bate co Pavero e lo destira;
200Smafaro che a Zenochio
Ghe porta fora un ochio;
Cagola che co Buso
Se afronta e le tol suso;
Mescola che a Triaca
205Co un pugno dà coi fiochi
Ghe scavezza una slaca
In quatro tochi;
Magnamorti che spira
Vitima d'un sberloto
210Del peso d'una lira
De la tremenda man de Taramoto;
Da un pugno de Tacon
De quei da confession
Ze Sbrogiaura
215Senza rimedio mastruzzà a dretura;
Subia da una scalzada,
Che ghe refila Peso,
Casca longo desteso
Su la strada;
220Folo co una pignata
Te me inzuca Patata
In tal maniera,
Che semivivo lo caluma in tera;
Co un memini de quei
225Da far duri i cavei
Frescusene a Maroca
Ghe cazza fora senza complimenti
Tuti i trentatre denti
Da la boca;
230Gerondio a Masaneta
Un cargo ghe ne peta;
Ze Calo da Scarpion
Strucà come un limon;
Baronzolo e Scarsela
235Da cani i se flagela;
Da Peto Setimana
Laorà ze a filagrana;
Naso ghe fa a Sbampio
In fregole el dadrio;
240Infati una caterva
De sti tablò se osserva,
I quali messi in tela
Da classici pitori
Saria una cossa bela
245Da guadagnar tesori,
Da darghe scacomato
In quanto sia argomenti
Ai quadri che ga fato
I più valenti;
250Saria cossa gradita quanto mai
A veder per esempio piturai
Rusola che a Durelo
Te ghe spaca el cervelo;
Trotolo che da Ingiostro
255El ze ridoto un mostro;
Datolo che da Sechio
Ze fato un santo vechio;
Spavento che da Aborto
Lassà ze mezzo morto;
260Siola che a Lazzareto
El ghe ne dà un brueto;
Drago che a Tutobuso
Ghe fa tanto de muso;
Gatolo che a Balena
265Co tuta indiferenza
Ghe scavezza la schena
De presenza;
Corno che a Masteghela
Ghe rompe una mascela;
270Buganza che a Spavento
Ghe fa far testamento;
E cussì tutiquanti quei campioni
Più forti dei lioni
Con aplauso e piacer
275Dei spetatori,
Bravi del so mistier,
Se petufa da veri professori,
Lassando assae de raro da una parte
Le principali regole de l'arte,
280Motivo per el qual gnente vien fato
Senza aver un felice risultato.
Difati la co' el caso se presenta
No se ghe dà una spenta
A l'aversario
285Senza mandarlo zo col tafanario;
No ghe ze stramuson che a chi el ghe toca
1 denti no ghe sbalza da la boca;
Là no se dà un sgrafon
Che no piova zo el sangue a pissolon:
290Pignata no vien dada
Senza la so inzucada;
No ghe ze pizzegoni
Che no se porta via
Co la pele fornia
295Carne a boconi;
No se dà scopazzon
El più clemente
Che no manda el paziente
A tombolon;
300No sbara la scalzada
El pie d'un prode
Che no costa salada
A chi la scode;
E no se mola un pugno
305Che no se rompa un sgrugno,
O coste, o gambe, o brazzi
A quei, per no dir altro, a quei strambazzi,
Proseliti de Marte,
Dei quali una gran parte,
310Sia Castelani opur sia Nicoloti,
Finisce la campagna
Come i pifari noti
De montagna,
Che per sonar ze andai,
315E invece i l'à sonai.
Poco su poco zo quelo che spesso
Facilmente se vede
Che fra de nu sucede,
E ze sucesso.
320Ma strenze l'argomento,
L'afar deventa bruto,
Cresce 'l combatimento,
E a profusion pertuto
Pim de qua, pum de là
325
Pugni e tonfi se dà
Cussì spietati
Che trema i fabricati,
E che lontan un mio
Fa che se senta
330El sordo mormorio
Che ve spaventa.
In contomile modi,
In forme diferenti,
Come se quei tormenti
335Fusse un godi,
Co studio e co bravura,
Senz'ombra de paura,
Con un coragio grando
I se le va pusando,
340E no i stralassa mai
Per aver le man strache,
O esser da le pache
Snombolai,
Anzi qualcun, che no s'aveva acorto,
345Seguitava a dar pugni, e gera morto.
I eviva popolari
A quela scena
In modo senza pari
Se scaena;
350Se rinova el fracasso,
Se ripete el bacan,
E el ceto manco basso
Fulmina i batiman
Dal giubilo che 'l sente,
355Efeto de bon cuor,
A veder tanta zente
Sul campo de l'onor
Squasi distruta
Da una tempesta suta
360De pugni madornali,
De slepe, de sgrafoni,
Bote da caporali,
Garofoli, pignate e pizzegoni,
Genere de conflito,
365Al qual a bon dirito
Spetaria
I elogi che vien fati
A qualche gran caia
Da le meschine idee dei leterati,
370Ch'esalta una insensada, o una fredura,
Come sagio de inzegno e de coltura,
E tante volte e tante
I porta ai sete cieli un ignorante.
Sto strepito, che tanti me conferma
375De averlo sin sentio
Nela nostra vicina teraferma,
Senza tregua va drio
Sin che i rapresentanti le fazion,
Che ga la comission
380De star atenti,
Montai sora un palcheto
Vestii da cavadenti,
Co tanto de coleto,
Cravata de sie dea,
385Camisiola de sea,
Braghe curte, velada,
Scapini, fiube, spada,
Bocheta alta do brazza,
Manegheti che sfioca,
390La so mata lumazza,
El so cigaro in boca,
E al fianco do bocai
De vin moscato
Per bagnarse 'l gargato,
395E star svegiai,
Vedendo le do armate
A forza de pugnar
Deboto andate
A farse budelar;
400Vedendo che a mumenti
I ancora combatenti
Tutiquanti
No pol più andar avanti;
E vedendo che Febo de cariera
405Abandonando el ponte
Ghe dà logo a la sera
Per far da l'orizzonte
El gran caorio,
E dopo de l'Aurora
410Da l'onde vegnir fora
El zorno drio,
A norma del statuto,
Che a mente i lo sà tuto,
Prima che fassa scuro
415I manda per stafeta
L'ordine che 'l tamburo
E la trombeta
A l'uso militar
I se meta a sonar
420La ritirata,
Aciochè sia sospesa su l'istante
Quela lota spietata
E stravagante,
Dove chi resta in condizion più trista,
425Più vien considerà, più gloria aquista.
Co un sussuro de casa de culù
Tutù, tutù, tutù, turututù,
Tan, tan, tarapatan, tarapatan,
Come no i avesse mai menà le man,
430Come precisamente
I gavesse scherzà,
Anzi come se gnente
Fusse stà,
L'odio, l'ira, la rabia, la vendeta,
435L'astio, l'antipatia,
A quel segnal se quieta,
E va cussì fenia
De pugni la cucagna,
Una tremenda guera,
440Che no ga la compagna
Su la tera;
Ossia per ben spiegarme
Con chi ze un poco tondo,
De tanti fati d'arme
445Nati dachè gh'è mondo,
Nissun ga certamente
Per la causa e l'efeto
Merito prevalente
De la pugna che forma el mio sogeto.
450No el gran combatimento de Granson,
Nel qual a Carlo el belo
Un colpo de canon
Ga porta via el capelo
E la peruca
455Rasandoghe la zuca;
No quelo de Abukir,
Che à obligà el gran visir
Salabakì
De star sconto tre dì
460Drento in burata,
Aciochè l'inimigo no lo cata,
E co l'è vegnù fora
El gera da farsora;
No quel su l'aque d'Azzo nel'Epiro
465
Fra Marcantonio e Cesare Otaviano,
Nel qual el primo per so gran deliro,
E in conseguenza per so imenso dano,
De la bela Cleopatra inamorà,
Anzi fora dei modi inasenio,
470Vedendola a scampar, da disperà
Co la so nave ghe ze corso drio,
Come, le me permeta,
Per bezzi corarave ogni poeta,
Lassandoghe cussì, l'è pura storia,
475Al secondo completa una vitoria,
E in conseguenza el gusto
Senza dificoltà
De vegnir proclamà
Cesare Augusto;
480No quelo de la Boina strepitoso,
Che Giacomo secondo spaventà,
Vedendo el so nemigo vitorioso,
In Pranza ze scampà
Vestio da dona,
485E i Stuardi ga perso la corona;
No el tremendo condito a san Quintin
Nel qual se conta el fato,
Che 'l principe Culin,
Strategico in quei tempi rinomato,
490Corendo a più non posso
De negra note in piena ritirata,
S'à negà drento un fosso
Co l'armata,
Che tra cavali e fanti
495Gera cinquantamile e no sò quanti;
No la bataglia classica de Cane,
Indove che de Anibale i guerieri
I ga fato de l'aquile romane
Quel che fa dei polastri i galineri;
500No la spietata soto Salamina,
Nela qual Serse e tuta la so armata
Da Temistocle grego, testa fina,
Ze sta magnà in salata;
Quela che Tamerlan
505A colpi de atagan,
Montà in furori,
Ga tagià suso a fete
El fiero Baiasete
E sucessori;
510Quela su l'Elesponto
Nela qual Ibrain
Do zorni ze stà sconto
In t'un camin
De queli de cosina,
515Da dove una matina
Abasso l'è cascà,
Se la storia ze esata,
Dal fumo sofegà,
Drento in pignata
520Con un spavento estremo
E sorpresa del cogo,
Che gera in palagremo
Atorno al fogo;
Quela de Samberì,
525Nela qual in t'un dì
La trupa dei Bretoni
Ga fato i Gali deventar caponi,
Ossia a l'imensa armada
Dei Francesi
530Ga dà una tal castrada,
Che più de mezzi l'à lassai destesi;
Quela de Trebisonda e de Baruti,
Quela de Benevento,
Dove i ze morti tuti
535Dal spavento;
Nè le tante che à dà
Nele diverse età,
Veri campioni,
I nostri peruconi,
540Più fiere de la fiera,
Che sventolava su la so bandiera,
E che sempre ga fato in ogni sito,
Sia per tera o per mar,
L'inimigo tremar
545Col so rugito.
La lota, torno a dirlo, che mi canto
Su tute porta el vanto,
Se nei combatimenti che ò descrito
E in qualch'altro conflito
550De sta sorte
Da le spade, dai schiopi, dai canoni,
Contro so vogia gà incontrà la morte
Dei omeni a milioni,
Servindo de uno solo a l'ambizion,
555Al torto el più patente.
O per puro acidente
A la rason,
Nè à termina mai senza
Generar qualche seria conseguenza;
560Invece nela pugna, che da ani
Clamorosa ga logo
Fra tanti Nicoloti e Castelani,
No gh'è arme da tagio, nè da fogo,
Ze raro el caso che qualcun sia morto,
565Tuti per conto proprio se petufa,
Nissuna ga rason, nissun ga torto,
E al fin de la barufa,
Fora de tanti consolai da festa,
Qualunque cossa resta
570Su la tera
In te l'istesso stato che la gera.
Tasa dunque la storia
Le antiche guere, i gran combatimenti,
Anzi se ghe ne perda la memoria,
575No essendo più argomenti
Degni che i leterati
Vaga a deventar mati,
Nè essendo più sogeti
Che merita esser leti,
580Se quel che mi decanto
Su tuti porta el vanto;
E tasa anca la fama prepotente
Le vechie feste, i chiassi, i bacanali,
Che a Tebe, a Sparta, a Roma anticamente,
585Nel tripudio rivali,
Se faceva frequenti
In quei bei ani,
Che coreva i talenti
Come fra nu che core i carantani,
590Se za anca da sto lato,
Anca soto sto aspeto
Con un confronto esato
Superior ze de molto el mio sogeto,
Perchè se qua da stolidi, da mati,
595Senza saver percossa i se bastona,
Là in mezzo a gusti infami e depravati
Se adotava ogni massima barona,
E se andava co genio e studio grando
Le pratiche più inique esercitando.
600In base a tuto questo mi me par
De poder esclamar
Senza paura
D'una giusta censura:
Oh! fiera lota, oh! pugna strepitosa,
605
Oh! tremenda barufa, oh! ardita impresa,
Oh! gara formidabile e famosa,
Dachè mondo è stà mondo mai più intesa,
Oh! contrasto acanito, oh! eroica guera,
Oh! zorno memorando su la tera;
610Oh! spetacolo raro e sorprendente,
Oh! quadro singolar che val milioni,
Oh! scena prodigiosa e comovente,
Oh! preziosa racolta de lioni,
Oh! strepito, oh! trambusto, oh! tananai,
615Oh! esercito de mati spiritai;
Oh! robusti colossi de natura,
Oh! trupa dei più scelti paladini,
Oh! modeli de forza e de bravura,
Oh! turba valorosa de fachini,
620Oh! strani mostri de la specie umana
Da la specie ordinaria assae lontana;
Oh! geni a la parola stravaganti,
Oh! afato nova razza de Sansoni,
Oh! gusti che no ze de tutiquanti,
625Oh! purissimo estrato de campioni,
Oh! complesso de pele da tamburo,
Oh! masnada d'eroi dal brazzo duro;
Oh! sciame de demoni prepotenti,
Oh! drapelo de jene e cocodrili,
630Oh! colezion de bisse e de serpenti,
Oh! famegia de orsi e de mandrili,
Oh! zente de la patria onor e gloria,
De la qual sara eterna la memoria.
Andè novi Titani,
635Andè ziganti,
Andè razze de cani
Tutiquanti,
Che cani senza mira d'insultarve,
Eroi del tempo antigo,
640Mi posso ben chiamarve
Se assaltè l'inimigo
Nela maniera ardita,
Co l'impeto che lori
Cimentando la vita
645Assalta i tori;
Andè, sì andè, ambiziosi,
Che le future età
Le ve celebrerà
Prodi e famosi,
650Perchè sto canto, che no ga el secondo,
Gavarà vita sin che dura el mondo.
Dopo de tuto questo,
Mi che so un omo onesto,
Che go per mio tiran
655Un cuor de marzapan,
E che graziando Dio
So stà da la natura
Con predileta cura
Favorio
660De imponente cervelo,
Che 'l par quel d'un vedelo,
O quel d'un bo;
Mi che una lengua go
Longa ma schieta,
665Lassando da una parte
El linguagio busiaro del poeta
E avendo in odio Marte,
In tel (se me perdona)
Preterito Belona
670Co tuti de presenza
Quei stolti che ghe piase
La guera a preferenza
De la pase,
Trovo, se ò da parlar candidamente,
675Che sti nostri bravissimi antenati
In un grado eminente
I gera mati;
Mati sì, mati veri da baston,
De andarse a mastruzzar senza rason;
680E trovo che de lori
L'abia megio pensada i sucessori
Co l'aver mandà a monte sto dileto,
El qual, no se burlemo,
Ga assae del maledeto,
685E più se rifletemo
Che alfin ze veneziani
I Nicoloti e anca i Castelani.