La festa veneziana dei pugni/Canto II
|
XIX secolo
|
|
Edission original: |
Camillo Nalin, Pronostici e versi di Camillo Nalin, Volume III, Venezia, Giambattista Andreola, 1858 |
|
Fonte: |
| ← Canto I | Edission e fonte ▼ | Canto III → |
L'ora del gran conflito ze iminente,
Tuti stà là tirando i sporteloni,
Nissun se move, nissun dise gnente,
Par deboto che i sia senza polmoni,
5E per efeto de l'aspetativa
Par che la no se trova anima viva;
Quando rompendo el stato d'atonia
Dà tutiquanti, e tuto in t'un mumento,
Contrassegni decisi de alegria;
10Se vede subitaneo un movimento,
E se sente, preludio de la festa,
Le orchestre che ve fa tanto de testa.
Vien a marchia sforzada i combatenti
Dai padrini legitimi scortai,
15E aciochè no suceda inconvenienti
In do file sul ponte i ze schierai,
Dove i ghe lese regole e preceti,
Che per altro i se scorda apena leti.
Da una banda se vede i Nicoloti,
20Tochi de zovenoti;
Da st'altra i Castelani
Forti, robusti, sani,
E tuta bela zente,
Omeni ben tressai,
25No minga mezze spente,
No roveri bolai,
Musi da sant'ufizio,
De queli a mio giudizio
Da Basse de Caldier,
30Che aspeta el forestier
Per farlo caminar co manco peso,
O per lassarlo là longo desteso;
Vestidi questi e quei
Come i fusse zemei,
35Con corsiereti e con calzoni bianchi,
Papuzze, calze, e la so fassa ai fianchi,
1 primi negra afato,
E i secondi più rossa del scarlato,
Unica distinzion,
40Che gh'è tra le fazion.
De Nicoloti ghe ze Nasavento,
Granelo, Saltafossi, Petointiero,
Canola, Descusio, Boba, Spavento,
Brombola, Naso, Polo, Sbusafero,
45
Magnarospi, Bonigolo, Saeta,
Tacon, Calcagno, Brufolo, e Sangueta;
Diluvio, Casagranda, Manganelo,
Rusola, Capalonga, Pantegana,
Mantese, Cagacasi, Radeselo,
50Smafaro, Supiasassi, Palandrana,
Crepuscolo, Garatolo, Sangioto,
Nespola, Drago, Siola, e Taramoto;
Pantasso, Basapopoli, Cancrena,
Mescola, Carampetole, Busia,
55Ongia, Papuzza, Remenà, Balena,
Morte, Tromba, Frescusene, Scarpia,
E altri co dei nomi su sto tagio,
Tuti pieni de forza e de coragio.
De Castelani ghe ze Bocabela,
60Canfora, Panarizzo, Martorelo,
Maroca, Stracacani, Tarantela,
Sapasaldo, Sinonimo, Durelo,
Tribolato, Tubercolo, Peochio,
Sorze, Pavero, Gatolo e Zenochio;
65Spelonca, Ficanaso, Lazzareto,
Barometro, Sospiro, Sbrogiaura,
Centomile, Omicidio, Tiradreto,
Spasemo, Rosegoto, Sepoltura,
Turbine, Tutobuso, Lasagneta,
70Brisiola, Tavarnele, e Caneveta;
Giona, Ingiostro, Facaea, Copaoche,
Subia, Palandra, Ortiga, Batichiodo
Gendena, Gomitorio, Centoboche
Scrupolo, Pidepiombo, Panimbrodo,
75Sessola, Setechiape, Orco, Smegiazza,
E dei altri canonici de piazza,
Dei quali no me par
De dover seguitar
La descrizion,
80Tanto per la rason,
Che ritegno sia afato indiferente
Saver el nome d'ogni combatente,
Quanto per la paura,
Se me devo basar su l'esperienza,
85Che a sto passo arivà co la scritura
El benigno letor se me indormenza,
No per virtù del canto,
Che non ardisso de pretender tanto,
Quantunque da sto lato,
90No la ze presunzion,
Go la sodisfazion,
Che i mii versi prodigi à sempre fato,
Ma perchè a tanti co facilità
Se ghe concilià el sono a star atenti,
95E ze ben natural se sin se dà
De quei temperamenti,
Secondo el parer mio
Proprio beati,
Che ga sempre dormio
100Dachè i ze nati.
Ma eco che 'l sussuro
Del timpano e 'l tamburo
Dapertuto ribomba,
El rauco son de la tartarea tromba,
105E quel de la trombeta,
Anunzia che a mumenti
I nostri combatenti
Se le peta:
A sto primo segnal
110Sucede general
Un movimento,
Ze 'l popolo in fermento,
Inquieti ze i tosati,
Ze i omeni insolenti,
115Le done ze bisati,
Le tose ze serpenti,
Se move la marmagia,
Fa chiasso la canagia,
Fa strepito i galioti,
120Sbragia corendo i cani,
E intanto i Nicoloti,
E intanto i Castelani
Nel so interno contenti
Al solo imaginarse, che deboto
125I pol per i tratati sussistenti
Darsene un furegoto
Da veri professori
Co licenza de tuti i superiori,
Disposti in gran parada
130Sul ponte e su la strada,
Untando fogo i è là
Col naso ranzignà,
Coi denti streti,
E co la tremariola
135Per la violenza de dover star quieti;
No i pronunzia parola,
I se varda, i se mira,
Tirando tanto d'ochi,
E convulsi da l'ira,
140Ma saldi de zenochi,
Senza che nissun veda e nissun senta
Quei brutissimi cefi
Coi moti e coi sberlefi
I se cimenta,
145Sinamente che 'l mascolo se sbara,
E vien averto el campo de la gara.
Nè 'l sbaro i sente apena,
Che come dei mastini
Molai da la caena,
150Come tanti sassini,
Che quando co spavento
A saltar li vedè fora del fosso
Su l'istesso mumento
I ve ze adosso,
155Ve ferma, ve agredisce,
Ve spogia, ve bastona, ve ferisce
Senza sentir un fià de compassion,
E basta che ghe ocora,
Co un stilo o co un trombon
160In t'un bater de ochio ve fa fora;
Come faria la tigre nela tana
Dopo una setimana
De disun,
Se mai se combinasse
165Che se ghe aprossimasse
Qualchedun;
O veramente el lovo se un agnelo
A l'ora del disnar
Lo andasse a visitar
170Nel so tinelo;
Asvelti quanto el lievro co' inseguio
Da adrasto o da melampo
Cerca pien de pipio
De trovar scampo,
175Corendo in tal maniera,
Che par a l'ochio che nol toca tera;
Quanto l'orangutan
Se sola da lontan
Senza bustina
180El vedesse una bela contadina;
Presti più assae del gato co' dal buso
Da lu tanto spià
El sorze sfortunà
Ghe salta suso;
185E più se se pol dir
De la saeta,
Che la se fa sentir
Qualche secondo dopo che la peta,
I nostri patrii eroi,
190Che al dito de le carte
Gera la magior parte
Barcarioi,
E fachini e becheri,
E una masnada
195De zente dedicada
A dei mistieri
Che fusse su sto tagio,
Purchè de bel'aspeto,
De forza e de coragio;
200Più presti, lo ripeto,
De quel che mi lo digo,
Da la rabia furenti
Tuti ghe salta adosso al so nemigo,
E senza complimenti
205Al primo simiton
Patatin, pataton,
Da orbi lavorando,
Ognun dal proprio canto
Pugni va refilando
210Da ogio santo;
E sicome lo sà chi ze proveto,
Che nela confusion
El pugno spesse volte va sogeto
A gran trasformazion,
215Cussì nel pien furor
De la tempesta,
Nel'ardente calor
De quela festa,
Quando i pol, quando i crede e quando i trova,
220Che al bon esito giova,
I mola a profusion
Secondo l'ocasion
Peae che ghe l'impata
A la più brava zata
225Cavalina,
E a qualunque sia musso co' el se ustina,
Pizzegoni de quei,
Che par tanage i dei,
Spente cussì ben dae,
230Che cascar deve
Zozo a gambe levae
Chi le riceve,
Sberloti che riduse le ganasse
Come tante fugasse,
235Stramusoni potenti,
Che co' i toca
Fa saltar fora i denti
Da la boca,
Scopole cussì fisse,
240
Che per el manco le ve imatonisse,
E pignate de quele,
Che a chi ghe ne vien una refilada
Ghe riduse in panada
Le cervele.
245Come tanti demoni in modo orendo
Uno contro de l'altro
Se va tuti batendo,
E quel che ze più scaltro,
Che ga magior bravura,
250Che ga cuor,
Paga el competitor
Con un'usura
A segno esuberante,
Che son certo
255No torave el più esperto
Stochizzante,
Quantunque me sia accorto
Esserghe in sto raporto
Ai dì presenti
260Dei geni veramente sorprendenti.
Fra tanti Castelani e Nicoloti
Nel ardito cimento
Per la gloria condoti
In quel mumento
265Da l'astio, da la rania,
Senza saver ancora,
Come ò dito qua sora,
Per che rason i gabia
Fra de lori
270Quel'ira, quei furori,
Da cossa che procede
L'odio cussì acanito,
Per el qual i se vede
Spontanei nel conflito
275A capitar,
Per poderse pestar
Da disperai,
A la parola come bacalai,
E co la più decisa indiferenza,
280Co tuto el sanguefredo
Meter a repentaglio l'esistenza,
Emuli de Rinaldo e de Gofredo;
Fra tanti, lo ripeto,
Dotai de sto dileto,
285Che a chi ze come mi fio de paura
Ghe par contro natura
Tuti fa la so parte a maravegia,
No ghe n'è gnanca uno da scartar,
Che tuti se somegia,
290Generosi anca tropo, a dispensar
Pugni che se pol dirghe martelae,
Rote, spente, peae,
Che maca i ossi
Ai più forti colossi,
295E imponaria
A un Ercole, a un Golia.
El primo co do pugni da cartelo
Riduse 'l so rival come una strazza,
Uno ghe lo refila sul cervelo,
300E quel altro in tel vodo ghe lo cazza;
El secondo ghe dà co tanta ira
Un tonfo madornal fra capo e colo,
Che in tera semivivo lo destira
Zoso a gambe levae tamquam pandolo;
305El terzo al so nemigo salta ai ochi,
E co le onge ghe li porta fora,
Intanto che più abasso coi zenochi
Senza misericordia el lo laora;
El quarto una pignata ghe consegna
310Cussì ben calcolada e cussì fìssa,
Che ghe fa butar sangue da la tegna,
E no gh'ò più speranza che 'l guarissa;
El quinto co le man ghe va a la testa,
E lo brinca infurià per i cavei,
315Strassinandolo sina che i ghe resta
Co la pele del cragno in mezzo i dei;
El sesto imbestialio ghe piomba adosso
Co un colpo misurà cussì potente,
Che ghe sbrega la carne e spaca l'osso,
320Come mi spacarave un curadente;
El setimo più forte de Sanson
Con un pugno spietato in te la panza
Lo sbalza in aria a l'uso de balon
A vinti boni passi de distanza;
325L'otavo ghe dà un memini coi fiochi
Da farghe de la boca una sportela,
Ghe sbalza fora i denti, e ghe va a tochi,
Sbusando la ganassa, una mascela;
El nono con un colpo sotobanca,
330Senza che l'aversario se lo aspeta,
In boconi ghe fa la gamba zanca,
Come che se faria d'una bacheta;
El decimo da bile trasportà
Al so competitor ghe dà le croste,
335Lo va pestando più d'un bacalà,
E ghe riduse in fregole le coste;
l'undecimo ghe incastra un pizzegon
Co tanto acanimento in t'una slaca,
Che do lire de carne in t'un bocon
340Co l'osso relativo ghe destaca;
El decimosecondo inviperio
L'aversario sul fato fa sbasir
Co un pugno de calibro ben riuscio
In certo sito che no vogio dir;
345E tuti in conclusion nela barufa,
Nela gara spietata, nel trambusto,
Come fiere decise i se petufa,
I se pugna, i se petena de gusto.
Mostrando in ato pratico che prode
350Ze tanto quel che dà che quel che scode.
Da eroi tuti combate
Col so competitor,
Tutiquanti se bate
Co intrepido valor,
355Co singolar maestria
Nel gran cimento,
Tantochè pararia
Divertimento
Darse pache sonore,
360Darse bote de quele
Da lassarghe la pele
Anca se ocore;
Se contrasta la gloria,
Se alterna la vitoria,
365Ossia quelo da questo
In forza prevalente
El ghe ne tol su un pesto
Che no ve digo gnente,
E questo che de l'esito se gode
370Da là un pocheto resta
Da st'altro prode
Consolà da festa;
Tizio, che per mezz'ora
ln tanta so malora
375El manda tutiquanti
Queli che ghe vien soto,
Intiva dopo tanti
In quelo dal saroto,
Che lo inzuca,
380
E lo serve de barba e de peruca;
Cajo al de là famoso,
Che contro i più acaniti combatenti
Ze stà sora la broca vitorioso,
Alafin trova pan per i so denti,
385Avendo una sconfita,
Che grazia granda de salvar la vita;
E l'ardito Sempronio,
Che co intenso coragio
S'à misurà coi bravi da demonio,
390El peta drento in quelo dal formagio,
Che assae de lu più forte
El lo riduse a morte;
Piero che à vinto Polo,
Dandoghe un pugno solo
395De quei che ve lo zuro
Se butaria zo un muro,
Ze vinto da Martin
Con un solo papin,
Ma dà in tal forma,
400Che 'l va longo desteso e par che 'l dorma.
Zizole col confeto,
Lasagnoni,
Che ghe ne ze scometo
Dei milioni;
405Buli che su la tera
Drio le anagrafi esate
Ghe ne ze dapertuto a centenera,
E spezialmente in ste contrae beate;
Omeni al mondo nati
410Per far chiacole molte e pochi fati,
Dei quali in ogni tempo ghe n'è stai,
Ma che presentemente
Ze in modo sorprendente
Propagai
415Per cità, per vilagi e per campagne.
Da darghe 'l muso drento
A sti spacamontagne
Ogni mumento,
Vardè con che coragio,
420Con che disinvoltura,
Ste bestie da saragio,
Sti mostri de natura,
Fermi nel so progeto
No fa parole e se ne dà un brueto:
425Sansoni, Ercoli, Alcidi, e tutiquanti
I più forti ziganti,
Che vigorosi e arditi
Gavè operà prodigi in tanti siti,
E che al genere uman
430Gavè fato capir quanto vantagio
Ga chi mena le man
Co del coragio,
Vegnì vegnì a vedèr,
Ch'anca senza rason,
435
Per semplice piacer,
Per singolar passion,
Per so divertimento,
I nostri Castelani e Nicoloti
I se fa generoso tratamento
440De pugni, de sberloti,
De spente, de peae, de pizzegoni,
De pignate
Spietate,
E de sgrafoni,
445Da far per el dolor,
Che ze eloquente,
Andar el scodidor
In acidente:
Vegnì vegnì, che degno ze 'l sogeto,
450E che vegna ogni classe de persona
A veder come ancuo qua per dileto
La zente più robusta se bastona,
Come che combatendo testa a testa
I se flagela e pesta
455In modo tal,
Che ghe ne indormo ai bruti
Per finir squasi tuti
A l'ospeal,
E come da l'orgasmo entusiastà
460Qualcun canta vitoria
Nel'ato che dai pugni snombolà
L'è drio a spirar sul campo de la gloria.
Per ore co le ore
I nostri eroi
465Ze dove che più ocore
Atenti ai fati soi,
Dando e tolendo suso
Tutiquanti d'acordo
De quele pache che no ze più in uso,
470Dei pugni tali che li sente un sordo,
Sinchè dai, tira, para,
Sucede 'l parapiglia,
No ga più fren la gara,
L'ordine se scompiglia,
475Nasce la confusion,
E in mezzo d'un concerto
De pugni a profusion,
Che ve l'acerto
Par tante canonae,
480In mezzo le scalzae
De quei veri animali,
Che senza esagerar
Nissun ga da invidiar
Mussi e cavali,
485Fra tanto tananai,
Che tuti ga ridoto
Più o manco sasonai
Da quela nova specie de saroto,
Chi resta senza fià,
490Nè pol più dir parola,
E ze po da la fola
Strucolà;
Chi cerca de scampar
Da la borasca
495Per farse medicar,
Ma debole o che 'l casca
Opresso dal dolor,
O tenta inutilmente
Superar el furor
500De la corente,
Che se lo porta via
Indove nol voria;
Chi ridoto deposta un sancassan
Par che deboto el mora
505Senza trovar un can
Che lo socora;
Chi tuto in t'un mumento
Ze da la calca spento,
Nè podendo far fronte
510El vien precipità
Zoso del ponte,
E senza volontà
Va a far un bagno
Spesso cascando sora al so compagno;
515Chi invece dal timor de la sconfita,
Azzardando la vita
Temerario,
Se buta volontario
In mezzo el rio,
520E l'aversario se strassina drio;
Chi in tera destirà
Dal sfinimento
Con un resto de fià
Da pugni al vento,
525Credendo Dìo sà quanti
De averghene davanti;
Chi in fregole ga i ossi,
Chi i brazzi scavezzai
E per i pugni scossi
530E per i pugni dai;
Uno ze tuto pesto,
St'altro ze scortegà,
Uno ga roto el cesto,
St'altro ze snombolà;
535Chi resta con un ochio,
Chi co una rechia resta,
Chi ze slogà un zenochio,
Chi frantumà la testa;
Chi ga una gamba rota,
540Chi el naso sfracassà,
Chi ciga, chi sangiota.
E chi no tira el fià;
Chi spande le buele,
Chi perde el radeselo.
545Chi ga su la so pele
Più busi d'un crielo;
Uno ze pien de gnochi,
Afato sfigurà,
St'altro la carne a tochi
550Lassa de qua e de là;
E finalmente tanti,
Che tanto à resistìo,
Chi va col muso avanti,
Chi va col culo indrio;
555Nè avendo più maniera,
Estremo de sventura,
De alzarse su da tera
Per quanto che i procura,
Miseramente i resta
560In mezzo de la fraca
Pestai come se pesta
La triaca.
Intanto da le strade e fondamente,
Da l'alto de le case,
565El strepito se sente
De quei che se compiase
A veder sto flagelo,
Che adesso saria ingrato;
Se sente questo e quelo
570Co tanto de gargato
Infervorai
A cigar che i se sfende... bravi.. dai,
E dapertuti i lati
Se ascolta replicati
575
I clamorosi eviva
Che fa la comitiva,
El chiazzo, i batimani
Dei diversi comploti,
Chi ai bravi Castelani.
580Chi ai prodi Nicoloti.
Buta chi va in giacheta
Per aria la bareta
Coi picoli acessori.
Ognun za me capisce,
585Che là tanti de lori
Custodisce,
Non avendo rimorso de conscienza
De regalar l'udienza;
Slanza in alto i capei
590Anca le teste che no ga cavei,
Al publico mostrando in sta maniera
La so zuca pelada volentiera,
Segno più che evidente
Del giubilo che i sente;
595Sbampola a contenere fazzoleti
De richi e povareti,
E bianchi e quondam bianchi e de color,
Senz'abadarghe qualchedun bislaco,
Orbà dal bon umor,
600Se 'l lo ga sporco slodro da tabaco,
O indecente ridoto
Da più d'un sgnacaroto;
A risme da ogni parte
Va svolazzando carte
605Co canzon, co epigrami, co soneti
Composti da poeti
Senza nè ti nè mi,
Compagni pressopoco
A qualche nostro aloco,
610Che misurando i pi
Col so compasso
Crede de superar,
O almanco d'imitar,
L'Ariosto e 'l Tasso;
615E dopo quel tantin de petenada,
Che stando ai risultati
La ga costà salada
A sta razza stranissima de mati,
Dopo de tanto chiasso,
620Dopo tanto fracasso,
E tanto fogo,
Una tregua ga logo
De minuti,
Perchè i l'à spesi tuti.