La nova lege su la stampa
|
Edission original: |
Giovanni Mazier, Passatempi de Tasi Nane, Venezia, Fratelli Visentini, 1894 |
|
Fonte: |
Indice:Mazier - Passatempi de Tasi Nane, Venezia, Visentini, 1894.pdf |
| ← Amor de razza | Edission e fonte ▼ | Le çelebrità del zorno → |
Rapido in estasi
Pien de trasporto
Fato xe el miracolo
Nol xe più morto.
Giunto el xe a l'apice
Del so contento
Creà gà un zogatolo
Sto gran portento,
Come el desidera
La lege nova
Per ben del prossimo
Farà la prova.
Un fren teribile,
No se ghe scampa,
Messo à sta lege
Proprio a la stampa.
In questo secolo
Pien de pecai
I ciceroni
Più rafinai,
Un capitambolo
Far i promete
Per la paura
De le manete.
I geri insipidi
Senza rason
Certi zornali
De l'ocasion,
Uno per metodo
Da maldicente
Scriveva proprio
Cose da gnente,
St'altro del publico
Ben s'ocupava,
Dir mal de tuti
El se provava
E insinuandose
Co' cortesia
E lo portava
A l'anarchia
Opur da stupido,
Vero somaro
Magagne sconte
Meteva al ciaro.
Oh teste picole
Del mal costume,
Vere zirandole
Senza un acùme,
Tuto xe inutile
Ancùo ve zuro
La nova lege
Tien assae duro.
O sapientissimi
Avocatei
Gnanca ligarvela
Podè in tei dei.
Pasta da frotole,
Libeli e carte
Podè benissimo
Meter da parte.
Ancùo i fanatici,
Teste scaldae,
Se li fa corer
Co' do peae,
Ghe vol de' spirito
Zente esemplar
Che fassa al publico
Molto imparar.
Zente che giudica
Co' gran franchezza
Che de le cose
La soa belezza,
Mostra e considera
Co' bei riflessi,
Che sia utilissimi
A tuti i sessi,
Che l'uman genere
Se persuada
Che po' xe ora
De cambiar strada.
Co' questo metodo
Se fa gran cose
E se risparmia
Tanto de ose.
Scriver pochissimo
Nu dovaremo
E poche ciacole
Nu scambieremo.
Finchè mancandone
La volontà
Faremo quanto
Vien comandà.
Bravo e po' celebre
Legislator
Che de la stampa
Tocà gà el cuor.
Che in età prossima
Darà al paese
Scritori celebri
Senza pretese.