La primavera (Alvise Cicogna)
|
Edission original: |
Raccolta di poesie in dialetto veneziano d'ogni secolo nuovamente ordinata ed accresciuta, Volume unico, a cura de Bartolommeo Gamba, Venezia, G. Cecchini, 1845 |
|
Fonte: |
| Edission e fonte ▼ |
Giacinti, e violete
Fa in tera baossete:
Che gusto! che giubilo!
4L'inverno è scampà.
La neve è svania,
La brina è finia,
Xe tepida l'aria,
8El sol chiapa fìa.
Sgualdina, Anzoleto,
Col so cesteleto,
Salata, e radichio
12I va a sgarugiar.
Vardè la sisila,
La canta, la trila;
El nio la se fabrica,
16Tornada dal mar.
Le piegore salta,
S'ingropa, e rebalta...
Che stala?... sì al pascolo
20Co tuti i bebè:
Le guida Tognoto,
Sonando el subioto;
No ocore più l'elera:
24Erbeta ghe n'è.
Amici! fè ciera
Xe qua primavera:
Me 'l dise quel nuvolo...
28Sentì!... sentì el ton!
Ohimè! che sta idea
El cuor me ricrea,
E tuto desmentego
32Quel fredo baron.
Ancora un meseto,
E 'l russignoleto
Col canto ne sgiozzola
36Su l'anima el miel.
Stagion deliziosa!
Ti vien co la rosa,
Ti parti col giglio,
40Fior degno del ciel.